ប្រសិនអ្នកញ៉ាំអាហារមិនដឹងប្រភព និងពាសវាលពាសកាល នឹងនាំគ្រោះថ្នាក់ដល់សុខភាពទាំងបច្ចុប្បន្ន និងអនាគត។ យ៉ាងណាមិញ មានអាហារមួយចំនួនដែលនាំអ្នកកើតជំងឺមហារីក។ អាហារទាំងនោះមានដូចជា៖
១-មី
មិនថាមីកញ្ចប់ កំប៉ុង និងប្រអប់ឡើយ សុទ្ធតែមិនល្អ ដោយសារតែគេប្រើសារធាតុ Wax ដើម្បីកុំឲ្យស្អិតជាប់គ្នា និងរក្សាទុកបានយូរ។ Wax មានរូបរាងដូចក្រមួន ហើយវាមិនបង្កគ្រោះថ្នាក់ទៅជាពុលអ្វីនោះទេ គ្រាន់តែពេលជ្រាបចូលទៅក្នុងខ្លួនយើង នាំពិបាករំលាយ ហើយរយៈពេល ២ ថ្ងៃទើបសារធាតុនេះអស់ពីក្នុងខ្លួន។ នៅពេលយើងញ៉ាំមីរាល់ថ្ងៃសារធាតុ Wax នោះក៏កាន់តែមានច្រើនឡើងក្នុងខ្លួនយើង នាំឲ្យធ្វើឲ្យក្រពះពោះវៀនទៅជាស្អិត ពិបាកក្នុងការរំលាយអាហារ ពោះវៀនធ្វើចលនាមិនបានល្អ និងអាចឲ្យស្ទះ ឬចុកពោះវៀន។ នៅពេលពោះវៀនដំណើរការមិនល្អ យូរៗទៅអាចបង្កជាជំងឺរលាកពោះវៀន ហើយរលាកពោះវៀនរ៉ាំរ៉ៃអាចបង្កទៅជាជំងឺមហារីក។
២-អាហារខ្លោច
អាហារ Fast food ដែលយើងចូលចិត្តញ៉ាំ ដូចជាសាច់អាំងភាគច្រើន គឺជាពពួកសាច់ចង្កាក់ ឬមីឆា លតឆា ឬនំគូឆាយជាដើម ដែលអាហារទាំងនោះគ្រោះថ្នាក់ចំពោះសុខភាពខ្លាំងណាស់។ អាហារទាំងនោះ ភាគច្រើនជាប់កម្ទេចខ្លោចៗបណ្ដាលឲ្យមានគ្រោះថ្នាក់ចំពោះសុខភាពខ្លាំង ហើយក៏ជាកត្តាធំមួយដែលបង្កជំងឺមហារីក និងជំងឺច្រើនមុខទៀតទៅថ្ងៃមុខ។
៣-អាហារកំប៉ុង
អាហារកំប៉ុងភាគច្រើន ផ្ទុកសារធាតុរក្សាទុកបានយូរ និងគ្រឿងផ្សំមិនល្អ ជាពិសេសមានរសជាតិប្រៃ ដែលអាចនាំឲ្យលើសសម្ពាធឈាម និងប្រឈមមុខជំងឺទឹកនោមផ្អែម។ រាងកាយយើងពិបាកក្នុងការកិនរំលាយអាហារកំប៉ុងខ្លាំងណាស់ យូរៗទៅបង្កទៅជាជំងឺក្រពះ-ពោះវៀនរ៉ាំរ៉ៃ ហើយអាការៈរ៉ាំរ៉ៃទាំងនោះហានិភ័យបង្កទៅជាមហារីក។
៤-អាហារឆៅ
ប្រសិនបើមិនបានឆ្លងកាត់ការចម្អិន អាហារប្រាកដជាផ្ទុកបាក់តេរី និងមេរោគមួយចំនួន ដូចនេះ ទាល់តែប្រើកម្ដៅទើបអាចសម្លាប់បាន។
៥-អាហារប្រើខ្លាញ់ដដែល
ខ្លាញ់ដែលប្រើដដែលៗ បូករួមនឹងកម្ទេចកំទីសាច់ អាចប្រតិកម្មជាមួយខ្ទះ ឬឆ្នាំងដែកយប់ថ្ងៃៗ នឹងបង្កទៅជាសារធាតុពុល ដែលធ្វើឲ្យយើងបរិភោគទៅ កើតជាជំងឺផ្សេងៗ ដូចជាមហារីកពោះវៀន មហារីកថ្លើម និងបញ្ហាប្រព័ន្ធរំលាយអាហារ។ មិនតែប៉ុណ្ណោះប្រេងដែលពុះច្រើនម៉ោង និងច្រើនសារ ធ្វើឲ្យកើនបរិមាណជាតិខ្លាញ់បំប្លែង ហើយពេលញ៉ាំយូរៗទៅ នាំឲ្យមានជំងឺបេះដូង ដូចជាស្ទះសរសៃឈាមបេះដូង ខ្លាញ់រុំបេះដូងជាដើម៕