អាហារល្អសម្រាប់អ្នកជម្ងឺទឹកនោមផ្អែម ដើម្បីបង្កើនប្រព័ន្ធភាពស៊ាំ

រាល់ពេលរដូវរងារមកដល់ មនុស្សស្វែងរកមធ្យោបាយដើម្បីការពារខ្លួនពីជម្ងឺផ្តាសាយ និងការឆ្លងផ្សេងទៀត ហើយជាមួយនឹងការរីករាលដាលនៃជម្ងឺកូវីដ ការខ្វាយខ្វល់ពីវិធីពង្រឹងប្រព័ន្ធភាពស៊ាំរាងកាយ កាន់តែមានភាពសំខាន់។ ជាពិសេសនោះ គឺសម្រាប់អ្នកជម្ងឺទឹកនោមផ្អែម ដោយសារតែជាធម្មតា គឺពួកគាត់ងាយនឹងឆ្លងរោគ។ មានទំលាប់របៀបរស់នៅជាច្រើន ដែលអាចជួយបាន ដូចជាការធ្វើលំហាត់ប្រាណជាប់លាប់ ការគេងឱ្យបានគ្រប់គ្រាន់ និងកាត់បន្ថយស្ត្រេស។ ការគ្រប់គ្រងជាតិស្ករក្នុងឈាមរបស់អ្នកក៏មានសារសំខាន់បំផុតក្នុងការរក្សាប្រព័ន្ធភាពស៊ាំឱ្យខ្លាំងក្លា។ ខាងក្រោមនេះគឺជាអាហារសំខាន់៣យ៉ាង ដែលជួយដល់អ្នកជម្ងឺទឹកនោមផ្អែមក្នុងការពង្រឹងប្រព័ន្ធភាពស៊ាំ តាមគេហទំព័រវេជ្ជសាស្រ្ត ​WebMD។

១. ផ្លែឈើមានជាតិជូរ

មនុស្សជាច្រើនងាកទៅរកវីតាមីន C នៅពេលដែលពួកគេមានអារម្មណ៍ថាមានជម្ងឺផ្តាសាយ ព្រោះវាត្រូវបានគេស្គាល់ថា មានលទ្ធភាពជម្រុញការផលិតកោសិកាឈាមស ដែលចាំបាច់ក្នុងការប្រយុទ្ធប្រឆាំងនឹងការឆ្លង។ ផ្លែឈើដូចជាក្រូចថ្លុង ផ្លែក្រូច ក្រូចឆ្មា និង ផ្លែឈើជូរៗផ្សេងទៀត គឺជាប្រភពដ៏អស្ចារ្យនៃសារធាតុវីតាមីន C ។ ចៀសវាងទឹកក្រូចឆ្មារមានជាតិស្ករ ដែលអាចបង្កើនជាតិស្ករក្នុងឈាម។

២. គ្រាប់ធញ្ញជាតិ

វីតាមីន E គឺជាសារធាតុចិញ្ចឹមដ៏សំខាន់មួយទៀត ដែលជួយរក្សាមុខងារប្រព័ន្ធភាពស៊ាំ។ គ្រាប់ធញ្ញជាតិ ដូចជាគ្រាប់អាល់ម៉ុន គ្រាប់ផ្កាឈូករ័ត្ន និង គ្រាប់ល្ពៅជាដើម គឺជាប្រភពវីតាមីនដ៏ប្រសើរបំផុត។ វាក៏ផ្ទុកខ្លាញ់ប្រូតេអ៊ីន និងជាតិសរសៃ ដែលជួយគ្រប់គ្រងជាតិស្ករក្នុងឈាមផងដែរ។

៣. តែ

តែក្តៅត្រូវបានគេស្គាល់ថា ធ្វើឱ្យធូរស្បើយការឈឺបំពង់ក នៅពេលអ្នកឈឺ ប៉ុន្តែវាក៏អាចផ្ទុកនូវសារធាតុចិញ្ចឹមដែលជួយបង្កើនភាពស៊ាំបានដែរ។ តែមានផ្ទុកនូវសារជាតិ Flavonoids ដែលជាសារធាតុប្រឆាំងអុកស៊ីតកម្មដ៏ខ្លាំងក្លា ដែលប្រឆាំងនឹងរ៉ាឌីកាល់សេរីនៅក្នុងខ្លួន។ តែខ្ញីស្រស់ គឺជាជម្រើសដ៏ល្អមួយទៀត ព្រោះខ្ញីត្រូវបានគេដឹងថាបន្ថយការរលាកនិងបន្ថយជាតិស្ករក្នុងឈាម៕