មិនពិបាកឡើយ! អាការៈចង្អោរចង់ក្អួត គួរទទួលទាន ឬចៀសវាងអាហារអ្វីខ្លះ?

ធ្លាប់ដឹងទេថាអ្នកអាចបំបាត់អាការៈចង្អោរចង់ក្អួតបានយ៉ាងឆាប់រហ័សដោយគ្រាន់តែទទួលទានអាហារមួយចំនួន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារទាំងនោះមានអ្វីខ្លះ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអ្វីដែលអ្នកគួរទទួលទានដើម្បីបំបាត់អាការៈចង្អោរចង់ក្អួតឆាប់រហ័ស ៖

• អាហារគួរទទួលទាន

១. ផ្លែប៉ោម

ផ្លែឈើនេះមានផ្ទុកជាតិសសៃខ្ពស់និងជួយកម្ចាត់ជាតិពុលចេញពីរាងកាយបានយ៉ាងឆាប់រហ័ស។ វាក៏សម្រួលដល់ការរំលាយអាហារជួយពន្លឿនការដឹកជញ្ជូនឆ្លងកាត់ពោះវៀនជួយបំបាត់អាការៈចង្អោរចង់ក្អួត។

២. ខ្ញី

មានផ្ទុកសារធាតុ Gingerol និងសារធាតុ shogaol ដែលជួយបំបាត់អាការៈចង្អោរចង់ក្អួតគួរឱ្យកត់សម្គាល់។ ខ្ញីជួយបំបាត់អាការៈចាញ់កូនបានយ៉ាងប្រសើរផងដែរ។ អ្នកអាចទំពារខ្ញីស្រស់ ឬឆុងវាជាតែមុនទទួលទាន។ ត្រូវប្រាកដថាអ្នកមិនទទួលទានខ្ញីលើសកម្រិតកំឡុងពេលរដូវក្ដៅ ក៏ព្រោះវាអាចបង្កអាការៈក្រហាយទ្រូង។

៣. ទឹកដូង

ទឹកដូងដើរតួនាទីយ៉ាងសំខាន់សម្រាប់ជួយដោះស្រាយបញ្ហាចង្អោរចង់ក្អួត។ វាអាចជួយព្យាបាលអាការៈចាញ់កូនចំពោះស្ត្រីមានផ្ទៃពោះ។ អ្នកក៏អាចបន្ថែមទឹកក្រូចឆ្មារស្រស់ ១ស្លាបព្រាបាយជាមួយទឹកដូង ១កែវដើម្បីឆាប់បាត់អាការៈចង្អោរចង់ក្អួត។

៤. ផ្លែចេក

ជាពិសេសប្រសិនបើអ្នកក្អួតតែម្ដង! ចូរទទួលទានចេកបន្តិចដើម្បីបន្ធូរអាការៈនិងបំពេញជាតិទឹកគ្រប់គ្រាន់ក្នុងរាងកាយ។ ចេកជាប្រភពដ៏ល្អនៃប៉ូតាស្យូមជួយទប់ស្កាត់បញ្ហាខ្សោះជាតិទឹកក្នុងរាងកាយ។ ដូច្នេះផ្លែចេកភាគច្រើនត្រូវបានណែនាំឱ្យអ្នកមានបញ្ហាចង្អោរចង់ក្អួតនិងអ្នកដែលមានបញ្ហាពាក់ព័ន្ធក្រពះពោះវៀនទទួលទាន។

៥. តែរុក្ខជាតិ

ដូចជាតែជីអង្កាម ឬតែផ្កា chamomile គឺល្អណាស់សម្រាប់បំបាត់អាការៈចង់ក្អួត។

• អាហារគួរចៀសវាង

១. ផ្លែឈើមានជាតិអាស៊ីត

ការទទួលទានផ្លែឈើមានជាតិអាស៊ីតអាចបណ្ដាលឱ្យឈឺពោះកាន់តែខ្លាំង។ ដូច្នេះចូរព្យាយាមទទួលទានផ្លែឈើគ្មានជាតិអាស៊ីតដូចជាផ្លែចេកទើបប្រសើរ។

២. អាហារចៀន ឬបំពង

អាហារប្រភេទនេះអាចបង្កើនជាតិហ្គាស និងធ្វើឱ្យការរំលាយអាហារប្រែជាមិនល្អ។

៣. ទឹកដោះគោ (ផលិតផលអាហារផ្សំឡើងពីទឹកដោះគោ)

ផលិតផលអាហារផ្សំឡើងពីទឹកដោះគោ រួមបញ្ចូលទាំងទឹកដោះគោអាចបណ្ដាលឱ្យអាការៈចង្អោរចង់ក្អួត ឬក្អួតកាន់តែធ្ងន់ធ្ងរជាងមុន។

៤. ស្ករចម្រាញ់

អាហារដែលមានផ្ទុកសម្បូរទៅដោយជាតិស្ករចម្រាញ់ គឺពិបាកនឹងរំលាយ។ វាអាចបណ្ដាលឱ្យក្រហាយទ្រូង និងសូម្បីតែចង្អោរចង់ក្អួត។

៥. ភេសជ្ជៈសូដា

ភេសជ្ជៈសូដា ឬភេសជ្ជៈកាបូណាតផ្សេងទៀតអាចបង្កអាការៈក្រហាយទ្រូងនិងពិបាករំលាយអាហារ។ ភេសជ្ជៈប្រភេទនេះមានផ្ទុកជាតិស្ករខ្ពស់ និងអាចបណ្ដាលឱ្យឈឺពោះ។

៦. អាហារហឹរ

អាចបង្កការរលាកដល់ក្រពះនិងបណ្ដាលរោគសញ្ញានៃជំងឺរលាកក្រពះកាន់តែធ្ងន់ធ្ងរឡើង។ វាក៏អាចបង្កអាការៈចង្អោរចង់ក្អួត។

៧. គ្រឿងស្រវឹង

គ្រឿងស្រវឹង គឺមានលក្ខណៈសម្បត្តិបញ្ចុះជាតិទឹកដែលបណ្ដាលឱ្យរាងកាយបាត់បង់ជាតិទឹក ឬខ្សោះជាតិទឹកពីក្នុងរាងកាយ។ បញ្ហាខ្សោះជាតិទឹកក្នុងរាងកាយក៏អាចបង្កអាការៈចង្អោរចង់ក្អួត៕