ជួយចែករំលែក! អាហារអ្វីខ្លះសម្បូរវីតាមីន B2 ?

ភាគច្រើននៃពួកយើងប្រហែលជាមិនធ្លាប់ដឹងទេថាវីតាមីន B2 ឬសារធាតុ Riboflavin អាចផ្ដល់អត្ថប្រយោជន៍ស្មានមិនដល់ជាច្រើនចំពោះសុខភាពរួមបញ្ចលទាំងពង្រឹងប្រព័ន្ធភាពស៊ាំរាងកាយ, កាត់បន្ថយហានិភ័យនៃជំងឺខ្វះគ្រាប់ឈាមក្រហម, ពន្លឿនការដុតរំលាយអាហារ, រក្សាដំណើរការមុខងារខួរក្បាលនិងសសៃប្រសាទ ព្រមទាំងល្អសម្រាប់ស្បែក។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអ្នកអាចទទួលបានវីតាមីននេះពីក្នុងអាហារអ្វីខ្លះ? កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីប្រភពដ៏ប្រសើរនៃវីតាមីន b2 ​៖

១. សាច់

សាច់ក្រហម, សាច់គោ ឬសាច់ចៀម គឺសុទ្ធតែជាប្រភពដ៏ប្រសើរនៃវីតាមីន B2។ កុំភ្លេចព្យាយាមរួមបញ្ចូលក្រលៀននិងថ្លើមក្នុងរបបអាហារប្រចាំថ្ងៃផងដើម្បីរក្សាបាននូវបរិមាណគ្រប់គ្រាន់នៃសារធាតុ riboflavin ឬវីតាមីន B2។ ទោះជាយ៉ាងណាអ្នកមិនត្រូវទទួលទានសាច់ច្រើនលើសកម្រិតឡើយ។ ការទទួលទានក្នុងកម្រិតសមល្មមលាយជាមួយបន្លែទើបប្រសើរ។

២. គ្រាប់ធញ្ញជាតិ

គ្រាប់អាល់ម៉ុនត្រឹម ២៨ក្រាមអាចផ្ដល់ឱ្យរាងកាយនូវវីតាមីន B2 ដល់ទៅ ០.២៨មីលីក្រាម។ អ្នកក៏មិនគួរមើលរំលងគ្រាប់ធញ្ញជាតិផ្សេងទៀតដូចជាគ្រាប់ស្វាយចន្ទីនិងគ្រាប់រីករាយដែរ។

៣. បន្លែបៃតង

បន្លែបៃតងជាជម្រើសនៃអាហារដ៏ប្រសើរដែលមានផ្ទុកសម្បូរទៅដោយសារធាតុ riboflavin ឬវីតាមីន B2។

៤. ទឹកដោះគោ

មិនត្រឹមតែផ្ដល់នូវជាតិកាល់ស្យូមខ្ពស់ប៉ុណ្ណោះទេ ប៉ុន្តែទឹកដោះគោក៏ជាប្រភពដ៏ល្អបំផុតមួយនៃវីតាមីន B2 ផងដែរ។ ត្រឹម ១០០មីលីលីត្រនៃទឹកដោះគោផ្ដល់ឱ្យរាងកាយនូវវីតាមីន B2 ដល់ទៅ ០.១៨មីលីក្រាមដែលប្រហែលនឹង ១០.៥% នៃតម្រូវការប្រចាំថ្ងៃនៃវីតាមីននេះ។

៥. ឈីស

១០០ក្រាមនៃឈីសអាចផ្ដល់វីតាមីន B2 ឬសារធាតុ riboflavin ដល់ទៅ ១.៣៨មីលីក្រាមដែលប្រហែលនឹង ៨១%នៃតម្រូវការប្រចាំថ្ងៃ។

៦. ផ្សិត

១០០ក្រាមនៃផ្សិតអាចផ្ដល់ឱ្យរាងកាយនូវសារធាតុ riboflavin ឬវីតាមីន B2 ប្រមាណ ០.៤៩មីលីក្រាមប្រហែលនឹង ២៩ភាគរយនៃតម្រូវការប្រចាំថ្ងៃ។

៧. ស៊ុត

មិនត្រឹមតែជាប្រភពដ៏ប្រសើរនៃប្រូតេអ៊ីនប៉ុណ្ណោះទេ ប៉ុន្តែស៊ុតក៏មានផ្ទុកសម្បូរទៅដោយវីតាមីន B2 ផងដែរ។ ប្រមាណ ១០០ក្រាមនៃស៊ុតអាចផ្ដល់ឱ្យរាងកាយនូវវីតាមីន b2 ដល់ទៅ ០.៥១មីលីក្រាមដែលប្រហែលនឹង ៣០ភាគរយនៃតម្រូវការប្រចាំថ្ងៃ។

៨. ត្រី

ជាពិសេសត្រីសម្បូរខ្លាញ់ដូចជាត្រីសាលម៉ុន គឺប្រមាណ ១០០ក្រាមអាចផ្ដល់ឱ្យរាងកាយនូវវីតាមីន b2 ដល់ទៅ ២៩ភាគរយនៃតម្រូវការវីតាមីននេះប្រចាំថ្ងៃ។

៩. សណ្ដែកសៀង

ក្រៅពីជាប្រភពដ៏ល្អនៃប្រូតេអ៊ីនហើយនោះ សណ្ដែកសៀងក៏មានផ្ទុកវីតាមីន B2 ខ្ពស់ផងដែរ។ ត្រឹម ១០០ក្រាម គឺអាចផ្ដល់នូវវីតាមីននេះដល់ទៅ ០.១៨មីលីក្រាម។

១០. ផ្កាខាត់ណាខៀវ

ជាប្រភពនៃបន្លែដ៏ប្រសើរដែលមានផ្ទុកសម្បូរទៅដោយវីតាមីនចាំបាច់រួមបញ្ចូលទាំងវីតាមីន B2 និងសារធាតុប្រឆាំងអុកស៊ីតកម្ម។ ត្រឹម ១០០ក្រាមនៃប្រូខូលី ឬផ្កាខាត់ណាខៀវអាចផ្ដល់នូវវីតាមីន B2 ដល់ទៅ ០.១១៧មីលីក្រាម៕