ក្បាលពោះមិនស្រកសោះ អាចដោយសារតែអាហារទាំងនេះ!

មានហេតុផលជាច្រើនដែលធ្វើឱ្យមនុស្សឡើងខ្លាញ់ក្បាលពោះ ដែលរួមមានរបបអាហារមិនល្អ កង្វះលំហាត់ប្រាណ និងស្ត្រេស។ ប៉ុន្តែថ្ងៃនេះយើងនឹងផ្តោតសំខាន់ទៅលើអាហារដែលធ្វើឱ្យខ្លាញ់ក្បាលពោះកាន់តែធំ។ អ្នកប្រហែលជាខំរកវិធីសម្រកដោយហាត់ប្រាណមិនតិចនោះទេ តែអ្នកប្រហែលជាភ្លេចគិតពីរបបអាហាររបស់អ្នក។ ខាងក្រោមនេះគឺជាអាហារដែលអ្នកគួរជៀសវាង ប្រសិនបើអ្នកចង់ស្រកខ្លាញ់ក្បាលពោះ បើយោងតាមគេហទំព័រ Pulse។

១. ផលិតផលទឹកដោះគោ

ផលិតផលទឹកដោះគោ មានអត្ថប្រយោជន៍ចំពោះសុខភាព ប៉ុន្តែវាអាចធ្វើឱ្យអ្នកហើមពោះក្រោយពីទទួលទានរួច។ ប្រសិនបើអ្នកជាមនុស្សដែលងាយនឹងហើមពោះក្រោយផឹកទឹកដោះគោ អ្នកគួរតែជៀសឆ្ងាយពីវា ព្រោះតែអ្នកអាចជាមនុស្សខ្វះអង់ស៊ីមបំបែកសារធាតុឡាក់តូសក្នុងទឹកដោះគោ។

២. ទឹកក្រូចកំប៉ុង

ទឹកក្រូចកំប៉ុងគឺជាអ្នកចូលរួមចំណែកដ៏សំខាន់ក្នុងការធ្វើឱ្យមានខ្លាញ់ក្បាលពោះ ដោយសារតែវាមានសារធាតុស្ករច្រើន​។ ជាមួយគ្នានេះដែរ វាក៏មានផ្ទុកសារធាតុគីមីដើម្បីរក្សាទុកឱ្យបានយូរ ដែលនេះសុទ្ធតែធ្វើឱ្យក្បាលពោះអ្នកមិនស្រកនោះទេ។

៣. ដំឡូងបារាំងបំពង

ដំឡូងបារាំងបំពង ដែលជាអាហារសម្រន់មួយក្នុងចំណោមអាហារសម្រន់អ្នកចូលចិត្តជាងគេ គឺជាប្រភពនៃខ្លាញ់ក្បាលពោះ។ វាមានផ្ទុកទៅដោយខ្លាញ់មិនល្អ ដែលបង្កើនកូលេស្តេរ៉ុលនិងហានិភ័យនៃជម្ងឺបេះដូង ហើយក៏រួមចំណែកដល់ការឡើងខ្លាញ់នៅក្បាលពោះផងដែរ។

៤. អាល់កុល

ការសេពជាតិអាល់កុល ធ្វើឱ្យចាល់ជាតិទឹកក្នុងរាងកាយ ដែលបណ្តាលទៅជាការឡើងទម្ងន់ និង ពោះឡើងធំ។ ស្រាបៀរសំបូរទៅដោយកាឡូរី តែមិនមានសារធាតុចិញ្ចឹមសារពាង្គកាយនោះទេ ដែលវានឹងធ្វើឱ្យអ្នកដុះពោះមិនចុះឡើយ៕