មិនបាច់ទាល់តែប្រើផលិតផលថ្លៃៗឡើយ! ស្បែកភ្លឺរលោង បើឧស្សាហ៍ញ៊ាំអាហារទាំងនេះ

តើអ្នកធ្លាប់ឆ្ងល់ទេថាហេតុអ្វីបានជាមនុស្សខ្លះមានស្បែកភ្លឺរលោងស្រស់ស្អាត? មានកត្តាច្រើនណាស់ដែលធ្វើឱ្យស្បែកមានសភាពបែបនេះ ហើយមួយក្នុងចំណោមនោះ គឺការទទួលទានអាហារត្រឹមត្រូវ។ អ្វីដែលយើងទទួលទានជះឥទ្ធិពលចំពោះសុខភាពរាងកាយទាំងមូលតែម្ដង រួមទាំងសម្រស់ផងដែរ។ ដូច្នេះប្រសិនបើចង់ទទួលបានស្បែកភ្លឺរលោងស្រស់ស្អាត អ្នកគួរតែធ្វើការផ្លាស់ប្ដូរមួយចំនួនក្នុងរបបអាហារប្រចាំថ្ងៃ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួររួមបញ្ចូលក្នុងរបបអាហារប្រចាំថ្ងៃដើម្បីទទួលបាននូវសុខភាពស្បែកល្អប្រសើរស្រស់ស្អាតភ្លឺរលោង ៖

១. បន្លែបៃតង

ការរួមបញ្ចូលបន្លែបៃតងក្នុងរបបអាហារប្រចាំថ្ងៃ គឺជាវិធីដ៏ងាយបំផុតមួយដើម្បីបង្កើនភាពភ្លឺរលោងស្រស់ថ្លាបែបធម្មជាតិរបស់ស្បែក។ បន្លែបៃតងមានផ្ទុកសម្បូរទៅដោយសារធាតុប្រឆាំងអុកស៊ីតកម្ម, ជាតិរ៉ែសំខាន់ៗ និងសារធាតុចិញ្ចឹមចាំបាច់ដែលល្អណាស់សម្រាប់រក្សាសុខភាពរាងកាយទាំងមូល ព្រមទាំងសម្រស់។ ការទទួលទានបន្លែបៃតងជាប្រចាំអាចជួយឱ្យស្បែកចៀសផុតពីបញ្ហាស្រអាប់គ្មានពន្លឺជំនួសមកវិញនូវភាពទន់ភ្លឺរលោង។

២. ផ្លែឈើ

– ផ្លែស្វាយមានផ្ទុកសម្បូរទៅដោយសារធាតុប្រឆាំងអុកស៊ីតកម្ម និងវីតាមីន A ដែលជួយទប់ស្កាត់ភាពចាស់មុនវ័យ, រក្សាយឺតបត់បែននៃស្បែក និងការលូតលាស់កោសិកាស្បែកថ្មី។

– ផ្លែចេកមានផ្ទុកសម្បូរទៅដោយវីតាមីន A, វីតាមីន B និងវីតាមីន E ដែលជួយទប់ស្កាត់ភាពចាស់ជ្រីវជ្រួញមុនវ័យនៃស្បែក។

– ផ្លែល្ហុងជួយកម្ចាត់កោសិកាស្បែកងាប់ៗ និងសម្អាតភាពកខ្វក់ពីស្បែក។

– ផ្លែក្រូចនិងផ្លែគីវីមានផ្ទុកសម្បូរទៅដោយវីតាមីន C ដែលការពារស្បែកប្រឆាំងនឹងការលេចឡើងនូវស្នាមជ្រីវជ្រួញ ការពារស្បែកមិនឱ្យទទួលរងការបំផ្លាញពីកម្ដៅថ្ងៃ ព្រមទាំងបង្កើនការសំយោគកូឡាជែន រក្សាភាពក្មេងជាងវ័យ។ ត្របែក, ក្រូចថ្លុង និងស្ត្របឺរីជាផ្លែឈើផ្សេងទៀតដែលមានផ្ទុកសម្បូរទៅដោយវីតាមីន C។

– ដើម្បីរក្សាបាននូវស្បែកដែលមានសុខភាពល្អ ក្មេងជាងវ័យ ហើយភ្លឺរលោងស្រស់ស្អាត អ្នកគួរទទួលទានផ្លែបឺរជាប្រចាំនោះក៏ព្រោះតែផ្លែឈើនេះជាប្រភពដប្រសើរបំផុតមួយនៃជាតិខ្លាញ់សុខភាពល្អ វីតាមីន B-complex និងវីតាមីន E។

៣. ខ្លាញ់សុខភាពល្អ

អាហារដែលមានផ្ទុកសម្បូរទៅដោយជាតិខ្លាញ់សុខភាពល្អ unsaturated, អាស៊ីតខ្លាញ់អូមេហ្កា ៣ និងអាស៊ីតខ្លាញ់អូមេហ្កា ៦ គឺចាំបាច់ណាស់សម្រាប់ផ្ដល់ឱ្យស្បែកនូវជាតិខ្លាញ់ល្អគ្រាប់គ្រាន់ជួយឱ្យស្បែកភ្លឺរលោង, កាត់បន្ថយការរលាក, បញ្ហាមុន, ទប់ស្កាត់បញ្ហាស្បែកស្ងួត និងឡើងក្រហម។ ប្រភពដ៏ប្រសើរបំផុតនៃខ្លាញ់សុខភាពល្អរួមមានត្រីសម្បូរខ្លាញ់ និងគ្រាប់ធញ្ញជាតិជាដើម។

៤. ការ៉ុត

បន្លែមើមនេះជាប្រភពដ៏ប្រសើរនៃវីតាមីន A ដែលមិនត្រឹមតែល្អសម្រាប់សុខភាពភ្នែកប៉ុណ្ណោះទេ ប៉ុន្តែក៏ជួយកម្ចាត់មុន និងការរលាកលើស្បែកផងដែរ។ វីតាមីន A ឬ beta-carotene កាត់បន្ថយការផលិតហួសកម្រិតនៃកោសិកាស្បែកក្នុងស្រទាប់ខាងក្រៅនៃស្បែក។ ហើយវាក៏ជួយកាត់បន្ថយការប្រមូលផ្ដុំនៃកោសិកាស្បែកងាប់ៗដែលអាចបង្កការរាំងស្ទះដល់រន្ធញើសផងដែរ។

៥. ស៊ុត

មានផ្ទុកសម្បូរទៅដោយវីតាមីនក្រុម B ដែលជួយឱ្យស្បែកមានពន្លឺស្រស់ថ្លា, គ្មានស្នាម និងទប់ស្កាត់ភាពចាស់មុនវ័យ។ វាក៏មានផ្ទុកជាតិស័ង្កសីក៏ចាំបាច់សម្រាប់រក្សាស្បែកទន់រលោងផងដែរ។ ផ្នែកពណ៌លឿងនៃស៊ុតមានផ្ទុកសម្បូរទៅដោយបាយអូទីនដែលចាំបាច់សម្រាប់ស្បែកក្មេងជាងវ័យស្រស់ស្អាត។ ចំណែកវីតាមីន A ក្នុងស៊ុតវិញជួយជួសជុលកោសិកាស្បែកដែលខូចខាតនិងរក្សាស្បែកឱ្យមានសុខភាពល្អមានពន្លឺ៕