ខេត្តកំពង់ធំ ៖ រដ្ឋបាលខេត្តកំពង់ធំបានប្រកាសនៅព្រឹកថ្ងៃទី៩ ខែសីហានេះថា បន្ទាប់ពីបានរកឃើញអាជីវករក្នុងផ្សារកំពង់ធំ មានវិជ្ជមានជំងឺកូវីដ១៩ចំនួន០៥នាក់ និងបានបិទផ្សារកំពង់ធំជាបណ្ដោះអាសន្ន នៅថ្ងៃទី០៨ ខែសីហា ឆ្នាំ២០២១ ក្រុមគ្រូពេទ្យបានចុះពិនិត្យយកសំណាកអាជីវករចំនួន៤៤៨នាក់ និងបានរក ឃើញអ្នកវិជ្ជមានជំងឺកវីដ១៩ចំនួន២២នាក់ទៀត ។
រដ្ឋបាលខេត្តនឹងបន្តយកសំណាកអាជីវករ និងអ្នកពាក់ព័ន្ធផ្សេងទៀតដោយយកចិត្តទុកដាក់បំផុតសំដៅធ្វើយ៉ាងណាកាត់ផ្តាច់ឲ្យបានការឆ្លងរាលដាលក្នុងទ្រង់ទ្រាយធំក្នុងសហគមន៍ ។
ជាមួយគ្នានេះដែរ រដ្ឋបាលខេត្ដ សូមអំពាវនាវដល់អ្នកដែលធ្លាប់មានការពាក់ព័ន្ធផ្ទាល់នឹងបុគ្គលវិជ្ជមានទាំង២២នាក់ខាងលើ សូមរួសរាន់ទៅផ្ដល់សំណាក ដើម្បីវិភាគរកមេរោគកូវីដ១៩ នៅសាលាបឋម សិក្សាកំពង់ធំក្រុង នៅភូមិទី៥ សង្កាត់កំពង់ធំ ក្រុងស្ទឹងសែន ។
ចំពោះបងប្អូនដែលធ្លាប់មានការពាក់ព័ន្ធដោយប្រយោល ហើយមានការសង្ស័យ សូមពិនិត្យតាមដានសុខភាពផ្ទាល់ខ្លួនជាប្រចាំ និងត្រូវសម្រាកនៅផ្ទះដាច់តែឯង ។
ក្នុងករណីមានការប្រែប្រួលខុសប្រក្រតី ដូចជា ឡើងកម្ដៅលើស ៣៧អង្សាសេ ក្អក កណ្ដាស់ ឈឺបំពង់ក ត្រូវប្រញាប់ទំនាក់ទំនងអាជ្ញាធរ ឬមណ្ឌល សុខភាពដែលនៅជិតបំផុត ។
អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋមេត្តាជ្រាប និងចូលរួមអនុវត្តឲ្យ បានខ្ជាប់ខ្ជួននូវវិធានសុខាភិបាល ជាពិសេសវិធានការ «ពការពារ ៣កុំ» ដើម្បីការពារខ្លួនឯង ក្រុមគ្រួសារ និងសហគមន៍ពីជំងឺដ៏កាចសាហាវនេះ ៕
