រក្សាតុល្យភាពអ័រម៉ូន ស្បែកស្រស់ស្អាត បើខំញ៊ាំអាហារ ៧មុខនេះ

ការរក្សាបាននូវតុល្យភាព ឬកម្រិតត្រឹមត្រូវនៃអ័រម៉ូន គឺសំខាន់ណាស់ដើម្បីរក្សាបាននូវសុខភាពល្អប្រសើរសម្រស់ស្រស់ស្អាត។ អ័រម៉ូនដើរតួនាទីចាំបាច់ទាំងក្នុងការគ្រប់គ្រងអារម្មណ៍ រក្សាទម្ងន់ត្រឹមត្រូវ ល្អសម្រាប់ស្បែក ទប់ស្កាត់បញ្ហាសុខភាពបន្តពូជ និងរក្សាដំណើរការមុខងារប្រក្រតីរបស់រាងកាយចៀសផុតពីបញ្ហាសុខភាពផ្សេងៗ។ ដូច្នេះហើយទើបការរក្សាបាននូវតុល្យភាពអ័រម៉ូនជាអ្វីដែលអ្នកមិនគួរធ្វេសប្រហែលមើលរំលងឡើយ។ ប៉ុន្តែធ្វើយ៉ាងណាទើបអាចរក្សាតុល្យភាពអ័រម៉ូនបាន? កុំបារម្ភ! ថ្ងៃនេះវេបសាយសុខភាព  Health.com.kh នឹងបង្ហាញឱ្យដឹងអាហារដែលជួយគ្រប់គ្រងការផលិត ក៏ដូចជាតុល្យភាពនៃអ័រម៉ូន ៖ 

១. គ្រាប់អាល់ម៉ុន

គ្រាប់ធញ្ញជាតិប្រភេទនេះ គឺល្អណាស់សម្រាប់រក្សាសុខភាពស្បែក។ គ្រាប់ធញ្ញជាតិអាល់ម៉ុនជួយបង្កើនអ័រម៉ូន adiponectic ដែលជួយគ្រប់គ្រងកម្រិតនៃជាតិស្ករក្នុងឈាម។ ទន្ទឹមនឹងនេះកម្រិតនៃអ័រម៉ូន androgen ប្រែជាធ្លាក់ចុះទាប។ ការសិក្សាស្រាវជ្រាវជាច្រើនក៏បានរកឃើញផងដែរថាគ្រាប់ធញ្ញជាតិដូចជាអាល់ម៉ុនក៏អាចបណ្ដាលឱ្យកម្រិតនៃអ័រម៉ូនផ្សេងទៀតក្នុងរាងកាយបុរសដូចជា testosterone ធ្លាក់ចុះផងដែរ។ សូមបញ្ជាក់ថាអ័រម៉ូនទាំងនេះអាចបណ្ដាលឱ្យស្បែកស្ងួតនិងស្ដើង។

២. ផ្លែបឺរ

ផ្លែបឺរ គឺមានផ្ទុកនូវជាតិខ្លាញ់សុខភាពល្អដែលអាចជួយក្នុងការផលិតនូវកូឡេស្តេរ៉ូលល្អចាំបាច់នៅពេលសំយោគអ័រម៉ូន។ ហើយការសំយោគអ័រម៉ូន គឺជួយធ្វើអោយចរន្តឈាមរត់មានភាពល្អប្រសើរ ព្រមទាំងកម្រិតការបញ្ចេញអ័រម៉ូនផ្សេងៗ។ លើសពីនេះទៅទៀត ផ្លែបឺរក៏ជាប្រភពដ៏ប្រសើរនៃជាតិប៉ូតាស្យូម វីតាមីន E អាស៊ីតហ្វូលិក ជាតិសសៃ ម៉ាញ៉េស្យូម និងវីតាមីន B ដែលចាំបាច់ក្នុងការគ្រប់គ្រងកម្រិតត្រឹមត្រូវនៃអ័រម៉ូនផងដែរ។

៣. ផ្កាខាត់ណាខៀវ ឬប្រូខូលី

មានផ្ទុកសម្បូរទៅដោយសារធាតុដែលជួយគ្រប់គ្រងកម្រិតនៃអ័រម៉ូនភេទ ជាពិសេសអ័រម៉ូនអ៊ឺស្រ្តូជែន។ចំពោះមនុស្សស្រីអ័រម៉ូនអឺស្ត្រូសែន គឺចាំបាច់ណាស់ដើម្បីរក្សាបាននូវសុខភាពប្រព័ន្ធបន្តពូជល្អប្រសើរ រួមទាំងក្នុងការបង្កើនកម្រិតនៃស្រទាប់កូឡាជែន។ ទោះជាយ៉ាងណា អ័រម៉ូនអឺស្ត្រូសែនក៏បង្កផលវិបាកផងដែរប្រសិនបើកើនឡើងខ្ពស់ពេក។ ប៉ុន្តែកុំបារម្ភ! ការទទួលទានផ្កាខាត់ណាខៀវនឹងជួយគ្រប់គ្រងការផលិតអ័រម៉ូនអឺស្ត្រូសែន។

៤. ត្រីសម្បូរខ្លាញ់

រួមមានត្រីសាលម៉ុនជាដើមមិនត្រឹមតែផ្ដល់អត្ថប្រយោជន៍ចំពោះបេះដូងនិងខួរក្បាលប៉ុណ្ណោះទេ ប៉ុន្តែក៏មានឥទ្ធិពលល្អប្រសើរជួយក្នុងការគ្រប់គ្រងកម្រិតនៃអ័រម៉ូនផងដែរ។ ត្រីសាលម៉ុនមានផ្ទុកនូវអាស៊ីតខ្លាញ់អូមេហ្គា ៣ ដែលចាំបាច់ណាស់ក្នុងដំណើរការសំយោគកូឡេស្តេរ៉ូលនិងអ័រម៉ូន។

៥. ផ្នែកពណ៌លឿងនៃស៊ុត

ទោះបីជាផ្នែកពណ៌លឿងនៃស៊ុតមានផ្ទុកកូឡេស្តេរ៉ូលខ្ពស់ ប៉ុន្តែវាជាកូឡេស្តេរ៉លល្អដែលរាងកាយត្រូវការដើម្បីផលិតអ័រម៉ូន។ ហើយជាមួយនឹងការផលិតអ័រម៉ូននេះ ស្បែកនឹងចាប់ផ្ដើមប្រែជាទន់ ហើយមានសុខភាពល្អ។ អ្នកអាចទទួលទានស៊ុតឱ្យបានមួយគ្រាប់ក្នុងមួយថ្ងៃ។

៦. បន្លែបៃតង

អាហារមានផ្ទុកសម្បូរទៅដោយសារធាតុចិញ្ចឹមដូចជាបន្លែបៃតងជាជម្រើសដ៏ប្រសើរសម្រាប់រក្សាតុល្យភាពអ័រម៉ូន។ ហើយក៏ព្រោះតែវាក៏មានផ្ទុកសម្បូរទៅដោយសារធាតុប្រឆាំងអុកស៊ីតកម្ម ព្រមទាំងលក្ខណៈសម្បត្តិប្រឆាំងការរលាកនិងបន្ថយស្ត្រេស ការទទួលទានបន្លែបៃតងអាចជួយគ្រប់គ្រងកម្រិតនៃអ័រម៉ូន cortisol និងតុល្យភាពនៃអ័រម៉ូន estrogen។

៧. គ្រាប់ល្ង

គ្រាប់ល្ងជាប្រភពនៃសារធាតុ lignans ដែលជួយរក្សាកម្រិតត្រឹមត្រូវនៃអ័រម៉ូន estrogen ក្នុងរាងកាយ។ គ្រាប់ពូជនេះក៏ជាប្រភពដ៏ប្រសើរនៃអាស៊ីតខ្លាញ់អូមេហ្កា ៣ ដែលជួយទប់ស្កាត់និងព្យាបាលអាការៈស្បែកស្ងួត។ ដូច្នេះដើម្បីរក្សាសំណើមស្បែកអ្នកគួរព្យាយាមបន្ថែមគ្រាប់ល្ងក្នុងរបបអាហារប្រចាំថ្ងៃ។ដូច្នេះកុំរួមបញ្ចូលគ្រាប់ល្ងក្នុងរបបអាហារប្រចាំថ្ងៃ៕