ចង់ឱ្យសក់លូតវែងមិនពិ​បាកឡើយ បើចេះប្រើ “ស៊ុត”

ការប្រើប្រាស់ស៊ុតជាក្រែមបន្ទន់សក់ គឺល្អណាស់សម្រាប់ការលូតលាស់សក់តាមរយៈបរិមាណនៃជាតិប្រូតេអ៊ីនដែលវាមានផ្ទុក។ សក់ គឺត្រូវបានបង្កើតឡើងដោយប្រូតេអ៊ីន keratin ប្រមាណ ៧០ភាគរយ។ បរិមាណនៃប្រូតេអ៊ីនដែលមានផ្ទុកក្នុងស៊ុត គឺចន្លោះចាប់ពី ៣.៦ក្រាមទៅ ៦.៥ក្រាម ដូច្នេះហើយទើបស៊ុតប្រែជាវត្ថុធាតុដើមដ៏ល្អបំផុតមួយសម្រាប់ជម្រុញការលូតលាស់នៃសក់។ ក្រៅពីជួយជួសជុលសក់ខូចឡើងវិញ វាក៏អាចពង្រឹងភាពរឹងមាំនៃសសៃសក់បានផងដែរ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះប្រើប្រាស់ស៊ុតជម្រុញការលូតលាស់សក់ ៖

• អ្វីដែលត្រូវធ្វើ

១. គោះបំបែកស៊ុតទុកក្នុងចានគោមមួយ។

២. បន្ថែមប្រេងអូលីវ ១ស្លាបព្រាបាយចូល និងកូរ​ឱ្យសព្វដោយប្រើប្រាស់សម។

៣. ប្រសិនបើអ្នកមិនទាន់ត្រូវប្រើប្រាស់ភ្លាមទេ អ្នកអាចរុំផ្លាស្ទិកឱ្យជិតមាត់ចាន និងរក្សាទុកក្នុងទូរទឹកកកក៏បាន។

• របៀបប្រើប្រាស់

១. ជាដំបូងត្រូវកក់សម្អាតសក់ជាមួយសាប៊ូដូចពេលធម្មតាសិនដើម្បីកម្ចាត់ភាពកខ្វក់, ជាតិប្រេង និងធូលីចេញពីសក់។

២. ប្រើប្រាស់កន្សែងជូតសក់ដើម្បីសម្ងួតទឹកចេញខ្លះ។

៣. បន្ទាប់មកសឹមលាបល្បាយស៊ុតនិងប្រេងអូលីវដែលអ្នកបានលាយរួចលើសក់ដូចពេលប្រើប្រាស់សាប៊ូកក់សក់ ដោយផ្ដោតសំខាន់លើចុងសក់ផងដើម្បីទប់ស្កាត់ ក៏ដូចជាព្យាបាលសក់បែកចុង។

៤. ពាក់មួកផ្លាស្ទិកឱ្យជិតសក់សម្រាប់រយៈពេលពី ១០ ទៅ ២០នាទី។

៥. ចុងក្រោយលាយសម្អាតសក់ឱ្យជ្រះសព្វ រួចកុំភ្លេចប្រើប្រាស់ក្រែមបន្ទន់សក់ដូចពេលធម្មតាសម្រាប់រយៈពេលពី ២ ទៅ ៣នាទីសិនផង សឹមលាងសម្អាតសក់ចេញម្ដងទៀតជាមួយទឹកធម្មតាជាការស្រេច។

៦. អនុវត្តឱ្យបានម្ដងក្នុងមួយខែបានហើយ។

ចំណុចគួរចងចាំ ៖ ល្បាយស៊ុតមិនគួរទុកចោលលើសក់សម្រាប់រយៈពេលលើសពី ១០ ទៅ ២០ នាទីឡើយ ខណៈដែលវាអាចបណ្ដាលឱ្យសក់ស្ងួត៕