ប្រយ័ត្នធ្លាក់ខ្លួនកើតជំងឺទឹកនោមផ្អែមប្រភេទទី ២ បើមិនចោលទម្លាប់ ៨នេះ

ទម្លាប់ប្រចាំថ្ងៃអាចជះឥទ្ធិពលគួរឱ្យកត់សម្គាល់លើសុខភាពបង្កជាបញ្ហាផ្សេងៗរួមទាំងហានិភ័យនៃជំងឺទឹកនោមផ្អែមប្រភេទទី ២។ ថាតើកត្តាអ្វីខ្លះអាចបង្កជាជំងឺទឹកនោមផ្អែម? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលអ្នកគួរតែផ្លាស់ប្ដូរចេញ ឬបញ្ឈប់ដើម្បីចៀសផុតពីហានិភ័យនៃជំងឺទឹកនោមផ្អែមប្រភេទទី ២ ៖

១. ញ៊ាំអាហារនិងភេសជ្ជៈមានផ្ទុកជាតិស្ករខ្ពស់

ការកើនឡើងនូវកម្រិតជាតិស្ករខ្ពស់នៅក្នុងឈាម គឺជាកត្តាចម្បងដែលបង្កហានិភ័យនៃជំងឺទឹកនោមផ្អែមប្រភេទទី ២។ ហើយការទទួលទានអាហារមានផ្ទុកសម្បូរទៅដោយជាតិស្ករច្រើន គឺជាមូលហេតុទូទៅបំផុតមួយដែលបង្កបញ្ហាជាតិស្ករក្នុងឈាមឡើងខ្ពស់។

២. មិនញ៊ាំអាហារពេលព្រឹក

ស្ត្រីដែលរំលងអាហារពេលព្រឹកប្រឈមមុខខ្ពស់នឹងជំងឺទឹកនោមផ្អែមប្រភេទទី២ ជាងស្ត្រីដែលញ៊ាំអាហារពេលព្រឹករាល់ថ្ងៃ។ ការទទួលទានអាហារពេលព្រឹកអាចជួយធ្វើឱ្យដំណើរការនៃការដុតរំលាយអាហារក្នុងរាងកាយកាន់តែមានលក្ខណៈប្រសើរឡើង ព្រមទាំងជួយបំលែងជាតិស្ករទៅជាថាមពល។ ប្រសិនបើអ្នករំលងអាហារពេលព្រឹកនោះការដុតរំលាយអាហារក្នុងរាងកាយនឹងយឺតជាងធម្មតា ហើយការបំលែងជាតុស្ករទៅជាថាមពលក៏ជួបប្រទះបញ្ហាដូចគ្នា។ ដូច្នេះដើម្បីចៀសផុតបញ្ហានេះអ្នកគ្រាន់តែទទួលទានអាហារពេលព្រឹករាល់ថ្ងៃជាការស្រេច។ មិនចាំបាច់តែទទួលទានច្រើនពេកគ្រប់មុខនោះទេ អ្នកអាចទទួលទានត្រឹមយ៉ាអួរក៏បាន។

៣. មិនទទួលទានអាហារមានផ្ទុកសារធាតុប្រូបាយអូទិក

រួមមានយ៉ាអួរ និងគីមឈីជាដើមសុទ្ធតែមានផ្ទុកសារធាតុប្រូបាយអូទិកដែលល្អសម្រាប់សុខភាពពោះវៀន។ អ្វីដែលគួរឱ្យកត់សម្គាល់នោះ គឺសុខភាពពោះវៀនមិនល្អបង្កើនហានិភ័យនៃជំងឺទឹកនោមផ្អែមប្រភេទទី ២។ វេជ្ជបណ្ឌិតជាច្រើនបានឱ្យដឹងថាសុខភាពពោះវៀនល្អដោយសារវត្តមាននៃប្រូបាយអូទិកអាចជួយទប់ស្កាត់ហានិភ័យនៃបញ្ហាសុខភាពបានជាច្រើន។ មួយក្នុងចំណោមនោះ គឺការរលាកដែលផ្សារភ្ជាប់នឹងជំងឺទឹកនោមផ្អែមប្រភេទទី ២។

៤. ឧស្សាហ៍ញ៊ាំអាហារកែច្នៃ

មិនត្រឹមតែឡើងទម្ងន់ហួសប្រមាណប៉ុណ្ណោះទេ ប៉ុន្តែការទទួលទានអាហារកែច្នៃជាប្រចាំក៏បណ្ដាលឱ្យជាតិស្ករក្នុងឈាមឡើងខ្ពស់ផងដែរ! ជាតិស្ករខ្ពស់ក្នុងអាហារកែច្នៃបង្កើនហានិភ័យនៃជំងឺទឹកនោមផ្អែមប្រភេទទី ២។

៥. មិនត្រូវពន្លឺព្រះអាទិត្យ ឬកម្ដៅថ្ងៃសោះ

កម្ដៅថ្ងៃជាប្រភពដ៏ល្អបំផុតមួយនៃវីតាមីន D ដែលចាំបាច់សម្រាប់រក្សាសុខភាពលំពែង។ ហើយលំពែងដែលមានសុខភាពល្អ គឺសំខាន់ណាស់សម្រាប់ការផលិតអាំងស៊ុយលីនបានត្រឹមត្រូវ។ ដើម្បីអាចជៀសផុតពីបញ្ហាសុខភាពផ្សេងៗអ្នកគួរអនុញ្ញាតឱ្យរាងកាយត្រូវពន្លឺព្រះអាទិត្យសម្រាប់រយៈពេលពី ១០ ទៅ ១៥ នាទីក្នុងមួយថ្ងៃ។ ហើយចន្លោះម៉ោង ១០ ព្រឹក និង ម៉ោង ៤ ល្ងាច គឺជាពេលវេលាដ៏ប្រសើរបំផុត។

៦. ស្ត្រេស

នេះក៏ព្រោះតែភាពតានតឹងក្នុងអារម្មណ៍សឹងតែគ្រប់ពេលអាចបង្កើនកម្រិតនៃជាតិស្ករក្នុងលំហូរឈាម។ ម្យ៉ាងវិញទៀតស្ត្រេសក៏អាចបណ្ដាលឱ្យអ្នកទទួលទានអាហារនិងភេសជ្ជៈមានផ្ទុកជាតិស្ករខ្ពស់ច្រើនខុសធម្មតាផងដែរ។

៧. មួយថ្ងៃៗគេងច្រើនម៉ោងពេក

ការគេងច្រើនពេកបង្កើនហានិភ័យនៃជំងឺទឹកនោមផ្អែមគួរឱ្យព្រួយបារម្ភ។ នោះក៏ព្រោះតែការគេងច្រើនពេកបណ្ដាលឱ្យមានភាពធន់នឹងអាំងស៊ុយលីនដែលងាយវិវត្តទៅជាជំងឺទឹកនោមផ្អែមប្រភេទទី ២ ណាស់។

៨. មួយថ្ងៃៗអង្គុយច្រើនពេក

ពិតណាស់ការអង្គុយគ្រប់ពេល ឬពេញមួយថ្ងៃអាចធ្វើអោយអ្នកកើនទម្ងន់ហួសប្រមាណដោយមិនដឹងខ្លួនបាន។ នោះក៏ព្រោះតែការមិនធ្វើសកម្មភាពរាងកាយទប់ស្កាត់រាំងស្ទះដល់ការដុតបំផ្លាញកាឡូរី។ហើយកាឡូរីដែលមិនត្រូវបានដុតបំផ្លាញទាំងនោះនឹងបំលែងទៅជាខ្លាញ់ដោយរាងកាយនាំអោយធាត់។ អ្វីដែលគួរអោយបារម្ភថែមទៀតនោះ គឺភាពធាត់ជ្រុល ឬលើសទម្ងន់អាចបង្កើនហានិភ័យនៃជំងឺទឹកនោមផ្អែមប្រភេទទី ២ និងជំងឺបេះដូង៕