មាត់ធុំក្លិនមិនល្អពេលមករដូវ? កុំរំលងគន្លឹះងាយៗ ៥នេះ

អតុល្យភាពអ័រម៉ូនកំឡុងពេលមករដូវអាចបណ្ដាលឱ្យក្នុងមាត់មានក្លិនមិនល្អដោយសារវាបង្កបញ្ហាស្ងួតមាត់, ហើមអញ្ចាញ និងដំបៅពងបែកក្នុងមាត់។ ចង់ទប់ទល់គួរធ្វើបែបណា? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ទល់បញ្ហានេះ ៖

១. ទទួលទានទឹកឱ្យបានច្រើន

មាត់របស់អ្នកអាចប្រែជាស្ងួតកំឡុងពេលមករដូវ ដូច្នេះវាជាការសំខាន់ណាស់ក្នុងការរក្សាសំណើមឱ្យបានតាមរយៈការទទួលទានទឹកឱ្យបានច្រើនគ្រប់គ្រាន់ ខណៈដែលមាត់ស្ងួតអាចជះក្លិនមិនល្អ។ បន្ថែមពីនេះការទទួលទានទឹកក៏ជួយសម្អាតក្នុងមាត់បានយ៉ាងប្រសើរផងដែរ។

២. ខ្ពុរមាត់ជាមួយទឹកអំបិលក្ដៅឧណ្ហៗ

អ្វីដែលអ្នកត្រូវធ្វើ គឺគ្រាន់តែលាយអំបិល ១ស្លាបព្រាកាហ្វេក្នុងទឹកក្ដៅឧណ្ហៗ ១កែវ។ កូរឱ្យសព្វ សឹមលាងសម្អាតក្នុងមាត់ជាប្រចាំ។ វិធីនេះក៏ជួយកម្ចាត់បាក់តេរីដែលបង្កក្លិនមិនល្អពីក្នុងមាត់ផងដែរ។

៣. ជែលប្រទាលកន្ទុយក្រពើស្រស់

អតុល្យភាពអ័រម៉ូនក៏នាំឱ្យមានបញ្ហាដំបៅពងបែកក្នុងមាត់ និងហើមអញ្ចាញដែលជាកត្តាបង្កក្លិនមិនល្អក្នុងមាត់ផងដែរ ដោយអ្នកមានភាពពិបាកនឹងដុសសម្អាតមាត់ធ្មេញ។ ក្នុងករណីនេះអ្នកអាចប្រើប្រាស់ជែលប្រទាលកន្ទុយក្រពើស្រស់ៗបន្តិចលាបលើកន្លែងដែលមានបញ្ហា។

៤. ចៀសវាងទទួលទានអាហារនិងភេសជ្ជៈផ្អែមៗ

កំឡុងពេលមករដូវ អ្នកអាចនឹងមានអារម្មណ៍ឃ្លានអាហារ ឬភេសជ្ជៈផ្អែម។ ទោះជាយ៉ាងណាការធ្វើបែបនេះមិនត្រឹមតែធ្វើឱ្យអ័រម៉ូនអតុល្យភាពថែមទោះនោះទេ ប៉ុន្តែក៏រួមចំណែកបង្កបញ្ហាធុំក្លិនមាត់មិនល្អផងដែរ។

៥. ព្យាយាមរក្សាអនាម័យមាត់ធ្មេញ

អ្នកមិនត្រូវខ្ជិលដុសសម្អាតមាត់ធ្មេញឡើយ ប្រសិនបើចង់រក្សាបានខ្យល់ដង្ហើមស្រស់ថ្លា។ ចូរជ្រើសរើសប្រើប្រាស់ច្រាស់ដុសធ្មេញដែលមានសសៃទន់ និងកុំភ្លេចប្រើខ្សែរ់ូតសម្អាតតាមចន្លោះធ្មេញថ្នមៗ៕