កុំខ្ជិលនឹងកក់សក់ថែម បើបញ្ហា ៧នេះលេចឡើង

ការកក់សក់តិចពេក ឬញឹកពេក គឺសុទ្ធតែមិនល្អឡើយចំពោះសុខភាពសក់និងស្បែកក្បាល។ ទោះជាយ៉ាងណាប្រសិនបើអាការៈទាំងនេះលេចឡើង នោះវាចង្អុលបង្ហាញថាអ្នកចាំបាច់គួរបង្កើនការសក់សម្អាតសក់ហើយ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីបញ្ហាដែលលេចឡើងនៅពេលអ្នកកក់សក់មិនទាន់គ្រប់គ្រាន់ ឬតិចពេក ៖

១. សក់ឡើងប្រេងខ្លាំង

អ្នកខ្ជិលនឹងកក់សក់ប៉ុណ្ណា ជាតិប្រេងលើសក់ប្រាកដជាកើនឡើងប៉ុននោះ។

២. សក់ជំពាក់រញ៉េរ៉ញ៉ៃ

ការកក់សម្អាតសក់បានតិចពេកអាចបណ្ដាលឱ្យកាកសំណល់នៃផលិតផលដែលអ្នកបានប្រើលើសក់ត្រូវប្រមូលផ្ដុំលើស្បែកក្បាល គួបផ្សំនឹងជាតិប្រេង និងញើសថែមទៀតនោះសក់ប្រាកដជាចៀសមិនផុតពីភាពងាយជំពាក់ជាប់គ្នាឡើយ។

៣. សក់មើលទៅគ្មានជីវិតនិងមិនរលាស់

ប្រសិនបើអ្នកកក់សម្អាតសក់មិនបានគ្រប់គ្រាន់ នោះសក់នឹងមើលទៅមិនរលាស់ដោយបរិមាណនៃជាតិប្រេងច្រើនពេកលើសក់ ព្រមទាំងស្បែកក្បាល។ ធូលីនិងភាពកខ្វក់ផ្សេងៗក៏ងាយតោងជាប់សក់ផងដែរ ប្រសិនបើជាតិប្រេងកើនឡើងច្រើន។

៤. សក់ធុំក្លិនអាក្រក់ ឬស្អុយ

អ្នកគួរចាប់ផ្ដើមកក់សម្អាតសក់ឱ្យញឹកញាប់ជាងមុនហើយ បើសិនជាវាមានក្លិនមិនល្អ។

៥. អង្គែពេញក្បាល

ភាគច្រើននៃពួកយើងគិតថា អង្គែអាចកើតមានឡើងតែដោយសារស្បែកក្បាលស្ងួតប៉ុណ្ណោះ! ប៉ុន្តែតាមពិតទៅវាក៏អាចកើតឡើងដោយសារស្បែកក្បាលឡើងប្រេងខ្លាំងផងដែរ។ ការប្រមូលផ្ដុំនៃជាតិប្រេងលើសលុប, ធូលី និងភាពកខ្វក់អាចបណ្ដាលឱ្យស្បែកក្បាលកើតអង្គែខ្លាំង។

៦. រមាស់

អង្គែដែលនាំមកដោយការកក់សម្អាតសក់មិនបានញឹកញាប់ក៏អាចបង្កអាការៈរមាស់ពេញស្បែកក្បាលផងដែរ។ ការអេះមិនមែនជាដំណោះស្រាយឡើយ ខណៈដែលវាកាន់តែនាំឱ្យអង្គែឡើងច្រើន ហើយរមាស់ជាងមុន។ ម្យ៉ាងវិញទៀតការអេះស្បែកក្បាលខ្លាំងៗក៏នាំឱ្យសក់ជ្រុះគួរឱ្យបារម្ភ។

៧. ឡើងមុន

ប្រសិនបើអ្នកកក់សម្អាតសក់មិនបានគ្រប់គ្រាន់ទេនោះ រោគមុនក៏អាចលេចឡើងលើមុខគួរឱ្យកត់សម្គាល់។ ចុងសក់ដែលកខ្វក់និងមានជាតិប្រេងខ្លាំងអាចបង្ករោគមុននៅពេលប៉ះត្រូវស្បែក។ អ្នកក៏អាចឡើងមុននៅជើងសក់ និងសូម្បីតែស្បែកក្បាលប្រសិនបើមិនបានកក់សក់ឱ្យទៀងទាត់៕