ញ៊ាំខ្ទឹមហើយស្អុយមាត់? កុំរំលងទឹកក្រូចឆ្មារ, តែបៃតង និងគន្លឹះងាយៗទាំងនេះ

ញ៊ាំខ្ទឹមហើយធុំក្លិនមាត់? មិនពិបាកដោះស្រាយឡើយ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗបំបាត់ក្លិនស្អុយមាត់ក្រោយញ៊ាំខ្ទឹម ៖

១. ទឹកក្រូចឆ្មារ

អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ ១ស្លាបព្រាបាយក្នុងទឹកក្ដៅឧណ្ហៗ ១ពែង។ កូរឱ្យសព្វ សឹមប្រើប្រាស់ល្បាយនេះខ្ពុរសម្អាតមាត់សម្រាប់រយៈពេលពី ២ ទៅ ៣វិនាទីឱ្យបានពី ១ ទៅ ២ដងជាប្រចាំក្រោយអាហារ។

២. ដុសធ្មេញនិងកុំភ្លេចប្រើខ្សែរ៉ូតសម្អាត

ការដុសសម្អាតធ្មេញ និងការប្រើប្រាស់ខ្សែរ៉ូតសម្អាតតាមចន្លោះធ្មេញ គឺជាគន្លឹះដ៏សំខាន់ដើម្បីរក្សាអនាម័យមាត់ធ្មេញ។ វិធីនេះក៏ជួយកម្ចាត់ក្លិនខ្ទឹមក្នុងមាត់បានយ៉ាងប្រសើរផងដែរ។

៣. ប្រើប្រាស់ឧបករណ៍កោសសម្អាតអណ្ដាត

ការកោសម្អាតអណ្ដាតបានត្រឹមត្រូវអាចជួយកាត់បន្ថយក្លិននៃខ្ទឹមស ឬខ្ទឹមបារាំងក្នុងមាត់បានយ៉ាងឆាប់រហ័ស។

៤. ប្រើប្រាស់ទឹកខ្ពុរមាត់

បន្ទាប់ពីដុសសម្អាតធ្មេញ, កោសសម្អាតអណ្ដាត ចូរកុំភ្លេចប្រើប្រាស់ទឹកខ្ពុរមាត់ដើម្បីប្រាកដបានថា ខ្យល់ដង្ហើមមានភាពស្រស់ថ្លា។

៥. ម្សៅ Baking soda

អ្វីដែលអ្នកត្រូវធ្វើ គឺគ្រាន់តែបន្ថែមម្សៅ Baking soda ពី ១ ទៅ ២ស្លាបព្រាកាហ្វេក្នុងទឹកក្ដៅឧណ្ហៗ ១ពែង។ កូរឱ្យសព្វ សឹមប្រើប្រាស់ទឹកល្បាយនេះខ្ពុរសម្អាតមាត់ឱ្យបានច្រើនដងក្នុងមួយថ្ងៃក្រោយអាហារ។

៦. ទទួលទានទឹកដោះគោ

ការទទួលទានទឹកដោះគោពិតជាអាចកម្ចាត់ក្លិនខ្យល់ដង្ហើមមិនល្អបានគួរឱ្យកត់សម្គាល់។

៧. តែបៃតង

អ្វីដែលអ្នកត្រូវធ្វើ គឺគ្រាន់តែឆុងស្លឹកតែបៃតង ១ស្លាបព្រាកាហ្វេក្នុងទឹកក្ដៅ ១ពែង។ រងចាំសម្រាប់រយៈពេលពី ៥ ទៅ ១០នាទី សឹមត្រងកាកចេញ និងទទួលទានឱ្យទាន់ក្ដៅឧណ្ហៗពី ១ ទៅ ២ដងជាប្រចាំក្រោយអាហារ៕