ប្រយ័ត្ន! ងូតទឹក ១ថ្ងៃ ២ដង ឬច្រើនជាងនេះ អាចធ្វើឱ្យអ្នកជួបបញ្ហា

ប្រសិនបើអ្នកមានទម្លាប់ងូតទឹកនៅពេលព្រឹក នោះការងូតម្ដងទៀតក្រោយហាត់ប្រាណ ឬមុនពេលចូលគេងអាចបង្កផលប៉ះពាល់ដល់សុខភាពគួរឱ្យកត់សម្គាល់។ ការងូតទឹកច្រើនពេកអាចជះឥទ្ធិពលលើស្បែក, សក់ និងសូម្បីតែសុខភាពប្រព័ន្ធបន្តពូជ។ ខាងក្រោមវេបសាយ Health.com.kh នឹងបង្ហាញឱ្យដឹងពីផលប៉ះពាល់នៃការងូតទឹកច្រើនដងក្នុងមួយថ្ងៃ ៖

១. សក់កាន់តែឡើងប្រេងខ្លាំងជាងមុន

សក់ទើបនឹងកក់រួចថ្មីៗអាចផ្ដល់ភាពស្រស់ស្រាយ និងអារម្មណ៍ប្រសើរស្រស់ថ្លា ប៉ុន្តែការកក់សម្អាតសក់ញឹកញាប់ពេកអាចធ្វើឱ្យសក់មើលទៅឡើងប្រេងខ្លាំងជាងមុនទៀត។ នៅរាល់ពេលកក់សក់ជាមួយសាប៊ូ វាអាចបណ្ដាលឱ្យស្បែកក្បាលប្រែជាស្ងួតហើយចាប់ផ្ដើមផលិតជាងប្រេងកាន់តែច្រើន។ ជាធម្មតានៅពេលកក់សក់ នោះស្បែកក្បាលនឹងទទួលបានការម៉ាស្សា ដូច្នេះវាចាំបាច់ត្រូវផលិតជាតិប្រេងជាប់លាប់តាមនោះដែរដើម្បីទប់ស្កាត់ស្បែកក្បាលមិនឱ្យស្ងួត។ នេះជាលទ្ធផលដែលធ្វើឱ្យសក់មើលទៅឡើងប្រេងខ្លាំងជាងមុនយ៉ាងលឿន។

២. ស្បែកស្ងួត

ការងូតទឹកញឹកញាប់ពេកច្រើនតែផ្ដល់គ្រោះថ្នាក់ច្រើនជាងល្អ។ សាប៊ូទឹក, សាប៊ូដុំ និងទឹកក្ដៅអាចកម្ចាត់បាក់តេរីសុខភាពល្អ និងជាតិប្រេងធ្មជាតិចាំបាច់ពីស្បែក។ ជាតិប្រេងធម្មជាតិនៃស្បែកជួយឱ្យស្បែករក្សាបាននូវភាពក្មេងជាងវ័យនិងភ្លឺរលោងសម្រាប់រយៈពេលយូរ។ អ្នកឯកទេសខាងសើស្បែកមួយចំនួនណែនាំឱ្យងូតទឹកត្រឹមពី ២ ទៅ ៣ដងក្នុងមួយសប្តាហ៍ប៉ុណ្ណោះដើម្បីទប់ស្កាត់បញ្ហាស្បែករមាស់និងស្ងួតខ្លាំង។

៣. ឡើងអង្គែខ្លាំងជាងធម្មតា

សាប៊ូកក់សក់ភាគច្រើនអះអាងថាអាចធ្វើឱ្យសក់របស់អ្នកមើលទៅស្រស់ស្អាត, រលាស់, មានទម្ងន់ និងគ្មានអង្គែ ប៉ុន្តែការប្រើប្រាស់ញឹកញាប់ពេកអាចផ្ដល់ផលផ្ទុយមកវិញ។ ការកក់សម្អាតសក់ច្រើនដងពេកអាចធ្វើឱ្យស្បែកក្បាលប្រែជារមាស់និងសូម្បីតែរលាក។ ជាលទ្ធផលនៃបញ្ហាអង្គែ និងថែមទាំងអាចជ្រុះសក់ទៀតផង។

៤. ស្បែកកាន់តែឆាប់ប្រតិកម្ម

ជាពិសេសការងូតទឹកក្ដៅ! ខណៈដែលទឹកក្ដៅអាចកម្ចាត់ជាតិប្រេង និងសំណើមធម្មជាតិ ព្រមទាំងបាក់តេរីល្អៗដែលស្បែកត្រូវការដើម្បីរក្សាភាពទន់រលោងស្រស់ថ្លា ហើយមានសុខភាពល្អ។ ជាលទ្ធផលស្បែកប្រែជាស្ងួតកាន់តែខ្លាំង ចៀសមិនផុតពីការរលាក ព្រមទាំងឆាប់ប្រតិកម្មជាងមុនទៀតផង។ ដូច្នេះដើម្បីជាការប្រសើរចូរងូតទឹកក្ដៅឧណ្ហៗ ហើយប្រើប្រាស់សាប៊ូដុសខ្លួនកម្រិតស្រាលដែលមិនបំផ្លាញរបាំងការពារបែបធម្មជាតិរបស់ស្បែក។

៥. ជះផលប៉ះពាល់លើសុខភាពប្រព័ន្ធបន្តពូជ

តំបន់អាថ៌កំបាំងរបស់អ្នកអាចសម្អាតខ្លួនឯងបានដោយធម្មជាតិ ហើយការប្រើប្រាស់ផលិតផលលាងសម្អាតផ្សេងៗ ជាពិសេសសាប៊ូកម្រិតខ្លាំង ឬមានក្លិនក្រអូប ឬសាប៊ូជែលអាចជះផលប៉ះពាល់ដល់កម្រិត pH ត្រង់តំបន់នេះ។ ជាលទ្ធផលអាចបង្កបញ្ហាអតុល្យភាពនៃបាក់តេរី, ការរលាក និងសូម្បីតែផលប៉ះពាក់លើសុខភាពប្រព័ន្ធបន្តពូជ។ ដើម្បីជាការប្រសើរ ចូរជ្រើសរើសផលិតផលសម្អាតដែលមានកម្រិតស្រាល និងគ្មានក្លិនក្រអូបសម្អាតជុំវិញតំបន់អាថ៌កំបាំងរបស់អ្នក។

កំណត់សម្គាល់៖ នេះជាអត្ថបទស្រាវជ្រាវ។ វាមានបំណងផ្តល់ជូននូវព័ត៌មាន និងចែករំលែកចំណេះដឹងប៉ុណ្ណោះ។ វេបសាយសុខភាព Health.com.kh សូមមិនទទួលខុសត្រូវចំពោះការអនុវត្តតាមអត្ថបទខាងលើនោះទេ។ សូមបញ្ជាក់ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបជាមួយគ្រូពេទ្យដើម្បីទទួលការពិនិត្យនិងព្យាបាលបានត្រឹមត្រូវ៕