ចង់បានរាងស្លីមស្អាត? ទឹក, កាហ្វេខ្មៅ និងភេសជ្ជៈ ៣មុខនេះ អាចជួយឱ្យស្រកទម្ងន់

ចង់សម្រកទម្ងន់ និងរក្សារាងស្លីមស្រស់ស្អាត នោះអ្នកមិនគួរផ្ដោតការយកចិត្តទុកដាក់តែលើប្រភេទនៃអាហារឡើយ ព្រោះភេសជ្ជៈមួយចំនួនក៏ផ្ដល់អត្ថប្រយោជន៍គួរឱ្យកត់សម្គាល់ដូចគ្នា។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីភេសជ្ជៈដែលអ្នកគួរទទួលទានដើម្បីអាចស្រកទម្ងន់ដែលលើស ៖

១. ទឹក

មិនត្រឹមតែចាំបាច់សម្រាប់សុខភាពរាងកាយទាំងមូលដោយកម្ចាត់រាល់ជាតិពុលប៉ុណ្ណោះទេ ប៉ុន្តែទឹកក៏ជួយឱ្យឆ្អែតបានយូរកាត់បន្ថយការឃ្លានបានផងដែរ។ ការទទួលទានទឹកគ្រប់គ្រាន់ថែមទាំងជួយរក្សាកម្រិតនៃថាមពលគួរឱ្យកត់សម្គាល់។ ប្រសិនបើអ្នកធុញទ្រាន់នឹងទទួលទានទឹកធម្មតាហើយនោះ អ្នកអាចបន្ថែមផ្លែឈើប៉ុន្មានចំណិតលាយក្នុងទឹកក៏បាន។

២. ទឹកឃ្មុំ

ភេសជ្ជៈដែលល្អសម្រាប់ការស្រកទម្ងន់មួយទៀតនោះ គឺភេសជ្ជៈទឹកឃ្មុំ។ អ្វីដែលអ្នកត្រូវធ្វើ គឺគ្រាន់តែដាំទឹក ១ពែងឱ្យពុះ រួចសឹមបន្ថែមទឹកឃ្មុំ ១ស្លាបព្រាបាយ, ទឹកក្រូចឆ្មារស្រស់ ១ស្លាបព្រាបាយ និងម្សៅឈើអែម ១ស្លាបព្រាបាយចូល។ កូរឱ្យសព្វ សឹមទទួលទានឱ្យទាន់ក្ដៅឧណ្ហ។

៣. ទឹកបន្លែស្រស់

ប្រសិនបើចង់ស្រកទម្ងន់ អ្នកក៏គួរព្យាយាមទទួលទានទឹកបន្លែស្រស់ជាប្រចាំផងដែរ។ នេះក៏ព្រោះតែភេសជ្ជៈនេះមានផ្ទុកនូវសារធាតុចិញ្ចឹមសំខាន់ៗដូចជាជាតិសសៃ, វីតាមីន, ជាតិរ៉ែ និងសារធាតុប្រឆាំងអុកស៊ីតកម្មដែលចាំបាច់សម្រាប់ជម្រុញដំណើរការនៃការដុតរំលាយអាហារ។ ចូរព្យាយាមជ្រើសរើសបន្លែធម្មជាតិ ឬសរីរាង្គទើបប្រសើរ។

៤. ភេសជ្ជៈឈើអែម

ឈើអែមជួយគ្រប់គ្រងកម្រិតនៃជាតិឈាមល្អសម្រាប់កាត់បន្ថយការឃ្លានខ្លាំងនិងធ្វើឱ្យអ្នកមានអារម្មណ៍ឆ្អែតផងដែរ។ អ្វីដែលអ្នកត្រូវធ្វើ គឺគ្រាន់តែដាំទឹក ១ពែងឱ្យពុះ រួចបន្ថែមម្សៅឈើអែម ១ស្លាបព្រាកាហ្វ និងទឹកឃ្មុំធម្មជាតិ ឬសរីរាង្គ ១ស្លាបព្រាបាយចូល។ កូរឱ្យសព្វ សឹមទទួលទានភេសជ្ជៈនេះកន្លែងពែងមុនញ៊ាំអាហារពេលព្រឹក និងកន្លះពែងទៀតក្រោយញ៊ាំអាហារល្ងាច ៤៥នាទី។

៥. កាហ្វេខ្មៅ

ការទទួលទានកាហ្វេខ្មៅក្ដៅៗនៅពេលព្រឹក ឬកាហ្វេទឹកកកនៅពេលថ្ងៃអាចជួយបង្កើនការដុតរំលាយអាហារសម្រាប់រយៈពេលខ្លី និងកាត់បន្ថយភាពឃ្លានរបស់អ្នកបានផងដែរក្នុងពេលជាមួយគ្នានេះ។ ដើម្បីអាចបង្កើនល្បឿននៃការដុតរំលាយអាហារ ចូរកុំបន្ថែមស្ករ ឬទឹកដោះគោក្នុងកាហ្វេខ្មៅរបស់អ្នក។ ទោះជាយ៉ាងណា អ្នកក៏មិនត្រូវទទួលទានកាហ្វេច្រើនពេកដែរ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕