ដឹងទេ? ខ្ញី, ក្រូចឆ្មារ និងគ្រឿងផ្សំ ៦មុខនេះ អាចជួយសម្អាតពោះវៀន

ពោះវៀន គឺជាសរីរាង្គដ៏សំខាន់បំផុតមួយក្នុងរាងកាយសម្រាប់ដំណើរការមុខងារប្រព័ន្ធភាពស៊ាំត្រឹមត្រូវ និងរក្សាបាននូវសុខភាពរាងកាយទាំងមូលល្អប្រសើរ។ ហើយការលាងសម្អាតពោះវៀនធំ គឺចាំបាច់ណាស់ដើម្បីអនុញ្ញាតឱ្យប្រព័ន្ធរំលាយអាហាររបស់អ្នកដំណើរការកាន់តែមានប្រសិទ្ធិភាពផ្ដល់ឱ្យអ្នកនូវសុខភាពរឹងមាំ, ស្រកទម្ងន់ និងមានថាមពល។ ប៉ុន្តែថាតើអ្នកអាចលាងសម្អាតបន្សាបជាតិពុលចេញពីពោះវៀនបានដោយរបៀបណាទៅ? ងាយណាស់! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបសម្អាតពោះវៀនធំបន្សាបជាតិពុលបែបធម្មជាតិតាមរយៈការទទួលទានភេសជ្ជៈនិងអាហារមួយចំនួន ៖

១. ខ្ញី

អ្វីដែលអ្នកត្រូវធ្វើ គឺគ្រាន់តែចិញ្ច្រាំខ្ញីប្រវែង ២.៥សង់ទីម៉ែត្រឱ្យម៉ដ្ឋ បន្ទាប់មកពូតយកទឹកខ្ញីស្រស់ៗបន្ថែមចូលក្នុងទឹកក្ដៅឧណ្ហៗ ២ពែង។ កូរឱ្យសព្វ សឹមបន្ថែមទឹកក្រូចឆ្មារស្រស់ ៤ស្លាបព្រាបាយចូល។ កូរឱ្យសព្វម្ដងទៀត សឹមទទួលទានម្ដងបន្តិចៗពេញមួយថ្ងៃ។ ដើម្បីជាការប្រសើរ ចូរកុំភ្លេចខ្ពុរសម្អាតក្នុងមាត់ជាមួយទឹកធម្មតាក្រោយទទួលទានភេសជ្ជៈនេះ ខណៈដែលក្រូចឆ្មារមានផ្ទុកជាតិអាស៊ីត។

២. ទឹកផ្លែប៉ោមស្រស់

អ្វីដែលអ្នកត្រូវធ្វើ គឺគ្រាន់តែកិនក្រឡុកផ្លែប៉ោម ១ផ្លែជាមួយទឹកធម្មតា ១ពែងឱ្យម៉ដ្ឋសព្វ។ ទទួលទានភេសជ្ជៈទឹកផ្លែប៉ោម រួចរងចាំ ៣០នាទីសិន សឹមទទួលទានទឹកធម្មតា ១កែវ។ អ្នកអាចអនុវត្តច្រើនដងក្នុងមួយថ្ងៃជាប្រចាំសម្រាប់រយៈពេលយ៉ាងហោចណាស់ ៣ថ្ងៃ។

៣. ក្រូចឆ្មារ

អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ចំនួនម្ខាង, អំបិល ១ចិប និងទឹកឃ្មុំពី ១ ទៅ ២ស្លាបព្រាកាហ្វេក្នុងទឹកក្ដៅឧណ្ហៗ ១កែវ។ កូរឱ្យសព្វ សឹមទទួលទានរាល់ព្រឹកពេលពោះទទេរមិនទាន់ញ៊ាំអ្វីផ្សេង។ ខណៈដែលក្រូចឆ្មារមានជាតិអាស៊ីត ចូរកុំភ្លេចខ្ពុរសម្អាតមាត់ជាមួយទឹកធម្មតាក្រោយទទួលទានភេសជ្ជៈទឹកក្រូចឆ្មារដើម្បីទប់ស្កាត់បញ្ហាសឹកកាចាធ្មេញ។

៤. យ៉ាអួរ

អ្វីដែលអ្នកត្រូវធ្វើ គឺគ្រាន់តែទទួលទានយ៉ាអួរសុទ្ធដោយមិនបន្ថែមស្ករ ឬផ្លែឈើ ១ចានគោមឱ្យបានម្ដងទៅ ២ដងក្នុងមួយថ្ងៃជាប្រចាំ។

៥. ទឹកខ្មេះផ្លែប៉ោម

អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមពី ១ ទៅ ២ស្លាបព្រាបាយក្នុងទឹកក្ដៅឧណ្ហៗ ១កែវ រួចបន្ថែមទឹកឃ្មុំពី ១ ទៅ ២ស្លាបព្រាបាយចូល។ កូរឱ្យសព្វ សឹមទទួលទានរាល់ព្រឹកម្ដងក្នុងមួយថ្ងៃ។ កុំភ្លេចខ្ពុរសម្អាតក្នុងមាត់ជាមួយទឹកធម្មតាក្រោយទទួលទានភេសជ្ជៈនេះ ដើម្បីទប់ស្កាត់បញ្ហាពុកធ្មេញ។

៦. តែបៃតង

តែបៃតង ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលមានប្រសិទ្ធិភាពជួយកម្ចាត់ជាតិពុលគ្រោះថ្នាក់ចេញពីពោះវៀន។ តែបៃតងក៏មានផ្ទុកសារធាតុប្រឆាំងអុកស៊ីតកម្មផ្សេងទៀតដែលជួយបង្កើនសុខភាពពោះវៀន ក៏ដូចជារាងកាយទាំងមូលផងដែរ ដោយកម្ចាត់នូវរាល់ជាតិពុលដែលប្រមូលផ្ដុំក្នុងរាងកាយ។ អ្វីដែលអ្នកត្រូវធ្វើ គឺគ្រាន់តែឆុងតែបៃតង ១ស្លាបព្រាកាហ្វេក្នុងទឹកក្ដៅ ១ពែងសម្រាប់រយៈពេលយ៉ាងហោចណាស់ ១០នាទី រួចត្រងកាកចេញ និងបន្ថែមទឹកឃ្មុំបន្តិចចូល។ កូរឱ្យសព្វ សឹមទទួលទានឱ្យបានពី ៣ ទៅ ៤ដងក្នុងមួយថ្ងៃជាប្រចាំ។

៧. ទឹក

ការទទួលទានទឹកបានច្រើនគ្រប់គ្រាន់ គឺជាវិធីដ៏ងាយបំផុតមួយដើម្បីសម្អាតពោះវៀនរបស់អ្នក។ ទឹកចាំបាច់ណាស់សម្រាប់ការរំលាយជាតិសសៃបានត្រឹមត្រូវ។ ដូច្នេះប្រសិនបើអ្នកទទួលទានអាហារសម្បូរដោយជាតិសសៃច្រើន ប៉ុន្តែទទួលទានទឹកតែបន្តិចនោះអ្នកនឹងជួបប្រទះបញ្ហាពិបាករំលាយអាហារ ឬទល់លាមកជាមិនខាន។ ដើម្បីរក្សាបាននូវសុខភាពពោះវៀន ក៏ដូចជារាងកាយទាំងមូលល្អប្រសើរ ចូរទទួលទានទឹកឱ្យបានច្រើនគ្រប់គ្រាន់ជាប្រចាំ។

• ផលប៉ះពាល់ដែលអាចកើតមានពីការសម្អាតពោះវៀន

– វិលមុខ (បណ្ដាលមកពីកង្វះជាតិទឹកក្នុងរាងកាយ)

– ចង្អោរចង់ក្អួត និងក្អួតតែម្ដង

– រោគសញ្ញារលាកពោះវៀន

– ប្រតិកម្មអាឡែកស៊ី់

– គេងមិនលក់។

ប្រសិនបើអ្នកមានគម្រោងចង់សម្អាតពោះវៀន វាសំខាន់ណាស់ក្នុងការចងចាំនិងដឹងពីផលប៉ះពាល់ដែលអាចកើតមានឡើង។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕