គ្រាន់តែញ៊ាំ “ចេក” អាចជួយបំបាត់អាការៈឈឺខ្លួន និងអស់កម្លាំង

ការទទួលទានថ្នាំបំបាត់ឈឺចាប់ដើម្បីដោះស្រាយបញ្ហាឈឺចាប់ចុករោយរាងកាយ និងអស់កម្លាំងអាចផ្ដល់ផលអវិជ្ជមានច្រើនជាងល្អ។ បើដូច្នេះថាតើគួរធ្វើបែបណាទៅ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗបំបាត់អាការៈឈឺចាប់រាងកាយ ៖

១. ចេក

ក្នុងករណីភាគច្រើន ការឈឺខ្លួននិងសាច់ដុំ គឺបណ្ដាលមកពីកង្វះជាតិប៉ូតាស្យូមក្នុងរាងកាយ។ អ្នកអាចទទួលទានចេកជាប្រចាំដើម្បីទប់ទល់នឹងកង្វះនៃជាតិរ៉ែនេះ ហើយអាចផ្ដល់ថាមពលភ្លាមៗដល់រាងកាយ។ ចូរព្យាយាមរួមបញ្ចូលចេកក្នុងរបបអាហារប្រចាំថ្ងៃ ឬទទួលទានឱ្យបានពី ៣ ទៅ ៤ផ្លែជាប្រចាំ។

២. រមៀត

គ្រឿងទេសនេះមានលក្ខណៈសម្បត្តិប្រឆាំងការរលាក, បំបាត់ការឈឺចាប់ និងជួយព្យាបាលដែលអាចប្រឆាំងការឈឺចាប់រាងកាយ ព្រមទាំងពង្រឹងប្រព័ន្ធភាពស៊ាំបានផងដែរ។ អ្វីដែលអ្នកត្រូវធ្វើ គឺគ្រាន់តែបន្ថែមម្សៅរមៀត ១ស្លាបព្រាកាហ្វេក្នុងទឹកដោះគោក្ដៅ ១កែវ។ បន្ថែមទឹកឃ្មុំចូលបន្តិចនៅពេលភេសជ្ជៈចុះក្ដៅឧណ្ហៗ។ កូរឱ្យសព្វ សឹមទទួលទានឱ្យបានយ៉ាងហោចណាស់ម្ដងជាប្រចាំ។ អ្នកអាចព្យាយាមទទួលទានភេសជ្ជៈនេះនៅមុនពេលចូលគេងក៏ប្រសើរដើម្បីឆាប់គេងលក់បានស្កប់។

៣. ម្សៅឈើអែម

អ្វីដែលអ្នកត្រូវធ្វើ គឺគ្រាន់តែបន្ថែមម្សៅឈើអែម ១ស្លាបព្រាកាហ្វេក្នុងទឹកក្ដៅឧណ្ហៗ ១កែវ។ កូរឱ្យសព្វ សឹមបន្ថែមទឹកឃ្មុំចូលមុនទទួលទានឱ្យបានម្ដងជាប្រចាំ។

៤. វីតាមីន

រាងកាយត្រូវការវីតាមីនផ្សេងៗដើម្បីដំណើរការមុខងារបានប្រក្រតី។ កង្វះវីតាមីន B1, វីតាមីន D និងវីតាមីន E អាចបណ្ដាលឱ្យសសៃប្រសាទ ព្រមទាំងសាច់ដុំទទួលរងផលប៉ះពាល់ជាលទ្ធផលបង្កបញ្ហាខ្សោយសាច់ដុំ ក៏ដូចជាឈឺចាប់។ ដូច្នេះដើម្បីជាការប្រសើរ អ្នកចាំបាច់គួររួមបញ្ចូលអាហារសម្បូរដោយវីតាមីនសំខាន់ៗក្នុងរបបអាហារប្រចាំថ្ងៃដើម្បីចៀសផុតបញ្ហាឈឺខ្លួននិងអស់កម្លាំង។ ក្នុងករណីចង់ប្រើប្រាស់ថ្នាំគ្រាប់វីតាមីន អ្នកចាំបាច់ត្រូវពិគ្រោះយោបល់ជាមួយគ្រូពេទ្យជាមុនសិន។

៥. ឈើរី

ផ្លែឈើនេះអាចជួយកាត់បន្ថយការឈឺចាប់តាមរយៈលក្ខណៈសម្បត្តិប្រឆាំងការរលាក។ ក្រៅពីញ៊ាំផ្លែឈើរី អ្នកក៏អាចទទួលទានទឹកផ្លែឈើរីស្រស់ៗ ១កែវដោយមិនបន្ថែមស្ករឱ្យបាន ២ដងក្នុងមួយថ្ងៃ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕