ដឹងទេ? ទឹកក្រូចឆ្មារ និងគន្លឹះ ៤នេះ អាចកម្ចាត់កំណកកំបោរជាប់ធ្មេញ

ជាធម្មតាបញ្ហាកំណកកំបោរជាប់ធ្មេញ ឬក្រមធ្មេញច្រើនកើតឡើងនៅពេលអ្នកមិនអនុវត្តអនាម័យមាត់ធ្មេញ (ដុសសម្អាត, ប្រើខ្សែរ៉ូតសម្អាតធ្មេញ និងខ្ពុរសម្អាតមាត់) បានត្រឹមត្រូវទៀងទាត់។ នៅពេលអ្នកមិនកម្ចាត់កំណកកំបោរចេញពីធ្មេញ វានឹងកើនច្រើនឡើងក្ដាំង ហើយអាចបង្កជាបញ្ហាមាត់ធ្មេញផ្សេងៗ រួមទាំងជំងឺអញ្ចាញធ្មេញ។ ហើយទោះមិនរំលឹកក៏អ្នកទាំងអស់គ្នាប្រហែលជាដឹងហើយថា បញ្ហាកំណកកំបោរធ្វើឲ្យអ្នកបាត់បង់ភាពទាក់ទាញ និងទំនុកចិត្តយ៉ាងណាពេលញញឹម ឬត្រូវបើកមាត់។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីវិធីបែបធម្មជាតិងាយៗ តែមានប្រសិទ្ធិភាពខ្ពស់កម្ចាត់កំណកកំបោរជាប់ធ្មេញបានឆាប់រហ័ស ៖

១. ទឹកក្រូចឆ្មារ

អ្វីដែលអ្នកត្រូវធ្វើ គឺគ្រាន់តែជ្រលក់ច្រាសដុសធ្មេញក្នុងទឹកក្រូចឆ្មារស្រស់ ហើយដុសវាពេញលើធ្មេញរបស់អ្នកថ្នមៗជាការស្រេច និងកុំភ្លេចទុកចោលសម្រាប់រយៈពេល ១នាទីសិន សឹមខ្ពុរលាងសម្អាតមាត់ចេញជាមួយទឹកធម្មតា។ ត្រូវចាំថាទឹកក្រូចឆ្មារមានជាតិអាស៊ីតខ្លាំងដែលអាចបណ្ដាលឱ្យសឹកធ្មេញ ដូច្នេះត្រូវប្រើប្រាស់វាដោយប្រុងប្រយ័ត្ន។

២. ដុសសម្អាតធ្មេញឱ្យបានត្រឹមត្រូវ

ការដុសសម្អាតធ្មេញឱ្យបានត្រឹមត្រូវក្រោយពេលអាហារអាចជួយទប់ស្កាត់ការកកើតនូវកំណកកំបោរជាប់ធ្មេញបាន។ ចូរជ្រើសរើសប្រើប្រាស់ច្រាស់ដុសធ្មេញដែលមានសសៃទន់ និងប្រើរយៈពេលដុសសម្អាតធ្មេញឱ្យបានយូរគ្រប់គ្រាន់។ ដើម្បីជាការប្រសើរអ្នកចាំបាច់គួរដុសសម្អាតធ្មេញឱ្យគ្រប់សព្វកន្លែងសរុបរយៈពេល ២នាទី។ អ្នកក៏មិនត្រូវដុសធ្មេញខ្លាំងៗដែរ ខណៈដែលទម្លាប់នេះមិនត្រឹមតែបង្កគ្រោះថ្នាក់ចំពោះកាចាធ្មេញប៉ុណ្ណោះទេ ប៉ុន្តែវាក៏ធ្វើឱ្យស្រៀវធ្មេញទៀតផង។

៣. ប្រើប្រាស់ថ្នាំដុសធ្មេញមានជាតិហ្ល្វ័រអររ៉ាយ (Fluoride)

ថ្នាំដុសធ្មេញមានជាតិ Fluoride ជួយបង្កើនកំហាប់នៃ Fluoride ក្នុងធ្មេញដែលជួយពង្រឹងនិងទប់ស្កាត់បញ្ហាពុកធ្មេញ។ ការប្រើប្រាស់ថ្នាំដុសធ្មេញមានផ្ទុក Fluoride ក៏ជួយការពារធ្មេញដែលទទួលរងផលប៉ះពាល់ដោយសារបញ្ហាពុក ឬដង្កូវស៊ីពីបាក់តេរីដែលបង្កកំណកកំបោរផងដែរ។ អ្វីដែលអ្នកត្រូវធ្វើ គឺគ្រាន់តែប្រើប្រាស់ថ្នាំដុសធ្មេញ Fluoride ដុសសម្អាតធ្មេញឱ្យបានត្រឹមត្រូវជាប្រចាំយ៉ាងហោចណាស់ ២ដងក្នុងមួយថ្ងៃ។

៤. ម្សៅ Baking soda

អ្វីដែលអ្នកត្រូវធ្វើ គឺគ្រាន់តែលាយអំបិល ១ចិបជាមួយម្សៅ Baking Soda ១ស្លាបព្រាបាយ និងប្រើសម្រាប់ដុសធ្មេញដូចពេលធម្មតា។ ខ្ពុរសម្អាតក្នុងមាត់ចេញជាមួយទឹកក្ដៅឧណ្ហៗជាការស្រេច។ អនុវត្តសារឡើងវិញឆ្លាស់ថ្ងៃគ្នា។ នៅពេលកំណកកំបោរត្រូវបានកម្ចាត់ អ្នកក៏អាចបន្តប្រើរូបមន្តនេះម្ដងរៀងរាលពី ៧ ទៅ ១០ថ្ងៃ។

៥. ប្រើប្រាស់ខ្សែរ៉ូតសម្អាតធ្មេញជាប្រចាំ

ការប្រើប្រាស់ខ្សែរ៉ូតសម្អាតធ្មេញ គឺជាវិធីដ៏ប្រសើរបំផុតមួយដើម្បីកម្ចាត់កំណកកំបោរនិងកំទេចកំទីអាហារដែលជាប់ចន្លោះធ្មេញ។ ទម្លាប់នេះក៏ជួយទប់ស្កាត់មិនឱ្យមានការកកើតឡើងនូវកំណកកំបោរ និងជំងឺអញ្ចាញធ្មេញផងដែរ។ ដើម្បីជាការប្រសើរអ្នកចាំបាច់ប្រើប្រាស់ខ្សែរ៉ូតសម្អាតធ្មេញយ៉ាងហោចណាស់ ២ដងក្នុងមួយថ្ងៃ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕