រៀនធ្វើញ៊ាំខ្លះទៅ! តែខ្ញីក្រូចឆ្មារ ល្អណាស់ចំពោះ សុខភាពបេះដូង, ប្រព័ន្ធភាពស៊ាំរាងកាយ និងខួរក្បាល

ភាគច្រើននៃពួកយើងប្រហែលជាមិនធ្លាប់ដឹងទេថា តែខ្ញីក្រូចឆ្មារ អាចផ្ដល់អត្ថប្រយោជន៍ល្អៗអ្វីខ្លះចំពោះសុខភាពរាងកាយ។ កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបធ្វើតែខ្ញីក្រូចឆ្មារ ព្រមជាមួយផលល្អៗនៃភេសជ្ជៈធម្មជាតិនេះ ៖

• របៀបធ្វើភេសជ្ជៈតែខ្ញីក្រូចឆ្មារ

អ្វីដែលអ្នកត្រូវធ្វើ គឺគ្រាន់តែលាយក្រូចឆ្មារស្រស់ ២ បន្ទះ ឬ ២ចំណិតជាមួយខ្ញីដែលហាន់ជាបន្ទះៗចំនួនកន្លះពែង និងទឹកឃ្មុំឆៅ កន្លះពែងក្នុងក្រឡកែវមួយ។ ត្រាំគ្រឿងផ្សំនេះសម្រាប់រយៈពេលពី ២ ទៅ ៣ម៉ោងសិនដើម្បីឱ្យក្លាយជាស៊ីរ៉ូខាប់ៗ។ អ្នកក៏អាចរក្សាទុកក្នុងទូរទឹកកកសម្រាប់រយៈពេលពេញមួយយប់ផងដែរ។ បន្ទាប់មកគ្រាន់តែបន្ថែមល្បាយស៊ីរ៉ូនេះចំនួនពី ១ ទៅ ២ស្លាបព្រាពេញៗក្នុងទឹកក្ដៅឧណ្ហៗ ១ពែង។ កូរឱ្យសព្វ សឹមទទួលទានឱ្យទាន់ក្ដៅឧណ្ហៗ។ ប្រសិនបើអ្នកមិនចង់ធ្វើជាស៊ីរ៉ូទេនោះ អ្នកក៏អាចធ្វើតែខ្ញីក្រូចឆ្មារស្រស់ៗដោយបន្ថែមទឹកក្រូចឆ្មារស្រស់ និងខ្ញី ១បន្ទះក្នុងទឹកធម្មតា និងរម្ងាស់សម្រាប់រយៈពេលប្រហែលពី ១៥ ទៅ ២០នាទី សឹមត្រងកាកចេញ ហើយទទួលទានជាការស្រេច។ ទោះជាយ៉ាងណាត្រូវចាំថា ការទទួលទានអ្វីមួយច្រើនពេកអាចផ្ដល់ផលមិនល្អមកវិញចំពោះសុខភាព។

• អត្ថប្រយោជន៍នៃភេសជ្ជៈតែខ្ញីក្រូចឆ្មារ

១. ព្យាបាលអាការៈចង្អោរចង់ក្អួត ឬក្អួតតែម្ដង

នេះក៏ព្រោះតែខ្ញីមានផ្ទុកសារធាតុ Gingerol និងសារធាតុ shogaol ដែលជួយបំបាត់អាការៈចង្អោរចង់ក្អួតគួរឱ្យកត់សម្គាល់។ ភេសជ្ជៈតែខ្ញីក្រូចឆ្មារក៏ល្អសម្រាប់ព្យាបាលអាការៈក្រពះពោះវៀនផ្សេងទៀតរួមមានការពិបាករំលាយអាហារ, រាគរូស និងឈឺក្នុងពោះផងដែរ។

២. ពង្រឹងប្រព័ន្ធភាពស៊ាំរាងកាយ

ក្រូចឆ្មារជាប្រភពដ៏ប្រសើរនៃវីតាមីន C ដែលមានលក្ខណៈសម្បត្តិប្រឆាំងអុកស៊ីតកម្មនិងពង្រឹងប្រព័ន្ធភាពស៊ាំ។ ភេសជ្ជៈតែខ្ញីក្រូចឆ្មារក៏មានប្រសិទ្ធិភាពប្រឆាំងរោគឆ្លងផ្សេងៗដូចជាផ្កាសាយ ឬគ្រុនផ្ដាសាយ និងក្អកគួរឱ្យកត់សម្គាល់។

៣. ជួយឱ្យការចងចាំមានលក្ខណៈប្រសើរឡើង

ចង់ឱ្យការចងចាំមានលក្ខណៈប្រសើរឡើងជាងមុនឬ? កុំរំលងតែខ្ញីក្រូចឆ្មារ! ភេសជ្ជៈនេះមានផ្ទុកលក្ខណៈសម្បត្តិប្រឆាំងការរលាកនិងប្រឆាំងអុកស៊ីតកម្មដែលល្អណាស់សម្រាប់ពង្រឹងមុខងារចងចាំ។ ការទទួលទានតែខ្ញីក្រូចឆ្មាររាល់ព្រឹក គឺល្អណាស់សម្រាប់សុខភាពខួរក្បាលទាំងមូល ក៏ដូចជាកាត់បន្ថយហានិភ័យនៃជំងឺចាស់វង្វេង ( Alzheimer’s )។

៤. ពង្រឹងសុខភាពបេះដូង

វីតាមីន C ក្នុងតែខ្ញីក្រូចឆ្មារអាចជួយសម្រួលលំហូរឈាមទប់ស្កាត់បញ្ហាកកឈាមក្នុងសសៃឈាម។ ជាលទ្ធផលកាត់បន្ថយហានិភ័យនៃជំងឺគាំងបេះដូងនិងជំងឺដាច់សសៃឈាមខួរក្បាល។

៥. ជួយឱ្យមុខងារថ្លើមកាន់តែមានលក្ខណៈប្រសើរឡើង

ការគួបផ្សំគ្នារវាងក្រូចឆ្មារនិងខ្ញី គឺមានប្រសិទ្ធិភាពខ្លាំងណាស់ក្នុងការធ្វើឱ្យមុខងារថ្លើមទាំងមូលមានលក្ខណៈប្រសើរឡើង។

៦. បំបាត់អាការៈឈឺចាប់, ចុកពោះមករដូវ, ឈឺក្បាល និងការរលាកក្នុងរាងកាយ

តាមរយៈលក្ខណៈសម្បត្តិប្រឆាំងការរលាកនៃខ្ញីនិងក្រូចឆ្មារធ្វើឱ្យភេសជ្ជៈនេះជួយកាត់បន្ថយ ក៏ដូចជាបំបាត់អាការៈឈឺចាប់ផ្សេងៗមិនថាពាក់ព័ន្ធនឹងឈឺក្បាលប្រកាំង, ឈឺសន្លាក់ ឬសូម្បីចុកពោះពេលមករដូវ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕