ស្មានមិនដល់សោះ! គ្រាន់តែ គេងដាក់ខ្នើយនៅចន្លោះជើង អាចផ្ដល់ផលល្អ ៤នេះ

ភាគច្រើននៃពួកយើងប្រហែលជាមិនធ្លាប់ដឹងទេថា ការគេងដាក់ខ្នើយចន្លោះជើង អាចផ្ដល់ផលល្អៗស្មានមិនដល់ចំពោះសុខភាព។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរគេងដាក់ខ្នើយចន្លោះជើង ៖

១. វាជួយធ្វើឱ្យចរន្តឈាមរត់កាន់តែប្រសើរ

ការដាក់ខ្នើយមួយនៅចន្លោះជើងនិងលើកវាឡើងបន្តិចជួយសម្រួលលំហូរឈាមក្នុងរាងកាយគួរឱ្យកត់សម្គាល់។ ទម្លាប់នេះជួយដកសម្ពាធចេញពីសសៃឈាមនិងសម្រួលចរន្តឈាមរត់។ ជាលទ្ធផលធ្វើឱ្យមុខងារនៃសរីរាង្គផ្សេងៗក្នុងរាងកាយដំណើរការបានត្រឹមត្រូវ ព្រមទាំងពង្រឹងប្រព័ន្ធភាពស៊ាំទៀតផង។

២. ទប់ស្កាត់អាការៈស្រមុក

យោងតាមអ្នកជំនាញជាច្រើនបានឱ្យដឹងថា ការគេងផ្អៀងទៅខាងឆ្វេង គឺជាទីតាំងដ៏ល្អបំផុតមួយ ប្រសិនបើអ្នកកំពុងជួបប្រទះអាការៈស្រមុក។ ប៉ុន្តែការគេងផ្អៀងទៅម្ខាងបែបនេះអាចដាក់សម្ពាធទៅលើខ្នង និងត្រកៀក ដូច្នេះដើម្បីជាការប្រសើរចូរដាក់ខ្នើយនៅចន្លោះជើង ហើយអ្នកនឹងអាចទទួលបាននូវអារម្មណ៍ធូរស្រាល។

៣. កាត់បន្ថយភាពស្ត្រេសលើជង្គង់

ប្រសិនបើអាការៈឈឺជង្គង់ជាញឹកញយធ្វើឱ្យអ្នកភ្ញាក់សឹងរាល់យប់ អ្នកគួរចាប់ផ្ដើមគេងដោយដាក់ខ្នើយនៅចន្លោះជើងហើយ។ ភាពទន់នៃខ្នើយជួយឱ្យអ្នកមានអារម្មណ៍ធូរស្បើយនិងអាចបំបាត់អាការៈឈឺចាប់។ ប្រសិនបើអ្នកគេងផ្ងារ ចូរដាក់ខ្នើយក្រោមជង្គង់ ឬប្រសិនបើអ្នកគេងផ្អៀង ចូរដាក់ខ្នើយចន្លោះជង្គង់។

៤. ជួយឱ្យអ្នករក្សាបាននូវទីតាំងគេងត្រឹមត្រូវ

ការជ្រើសរើសទីតាំងគេងមិនបានត្រឹមត្រូវអាចបង្កគ្រោះថ្នាក់ដល់រាងកាយច្រើនជាងអ្វីដែលយើងស្មានមិនដល់ដោយអាចធ្វើឱ្យឈឺខ្នង, ចង្កេះ និងសន្លាក់។ ការគេងដោយដាក់ខ្នើយចន្លោះជើងអាចកាត់បន្ថយសម្ពាធលើខ្នងផ្នែកខាងក្រោមនិងឆ្អឹងកងខ្នង។ ប្រសិនបើអ្នកគេងផ្ងារ ការដាក់ខ្នើយតូចមួយក្រោមឆ្អឹងខ្នងអាចជួយឱ្យរាងកាយរក្សាបាននូវឥរិយាបទបានត្រឹមត្រូវ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕