ប្រយ័ត្ន! មិនញ៊ាំ “ស្ករ” សោះ អាចបង្កផលវិបាក ៥ នេះចំពោះសុខភាព

ភាគច្រើននៃពួកយើងតែងចង់ដកស្ករចេញពីក្នុងរបបអាហារនៅពេលចាប់ផ្ដើមទទួលទានអាហារសុខភាពល្អ។ ប៉ុន្តែមិនមែនស្ករទាំងអស់សុទ្ធតែអាក្រក់ចំពោះសុខភាពឡើយ! ស្ករដូចជាស្ករអំពៅ ឬជាតិស្ករដែលមានក្នុងផ្លែឈើនិងបន្លែអាចផ្ដល់អត្ថប្រយោជន៍ចំពោះសុខភាពនិងសម្រស់នៅពេលទទួលទានក្នុងកម្រិតមធ្យម។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលវិបាកដែលកើតឡើងនៅពេលអ្នកមិនញ៊ាំស្ករសោះ ៖

១. សក់អាចលូតលាស់កាន់តែយឺតជាងមុន

ខណៈដែលការទទួលទានស្ករចម្រាញ់ច្រើនពេកមិនអាចផ្ដល់ផលល្អអ្វីចំពោះសុខភាពសក់ នោះការបន្ថែមស្ករអំពៅមួយចំនួនក្នុងរបបអាហារពិតជាអាចជួយឱ្យសក់របស់អ្នកលូតលាស់បានវែងជាងមុនយ៉ាងឆាប់រហ័ស។ ស្ករអំពៅមានលក្ខណៈសម្បត្តិបញ្ចុះទឹកនោមបែបធម្មជាតិ ហើយវាជួយកម្ចាត់រាល់ជាតិពុល និងកម្ចាត់ជាតិអំបិលដែលលើសពីរាងកាយធ្វើឱ្យមុខងារតម្រងនោមមានលក្ខណៈប្រសើរឡើង។ អ្វីដែលគួរឱ្យកត់សម្គាល់នោះ គឺប្រសិនបើតម្រងនោមមិនអាចដំណើរការមុខងារបានប្រក្រតីទេនោះ វាអាចបង្កបញ្ហាសុខភាពគួរឱ្យបារម្ភជាច្រើនរួមបញ្ចូលទាំងបញ្ហាជ្រុះសក់។ ការរួមបញ្ចូលស្ករអំពៅបន្តិចក្នុងរបបអាហារប្រចាំថ្ងៃ គឺជាវិធីដ៏ល្អបំផុតសម្រាប់ធ្វើឱ្យសក់មានពន្លឺនិងក្រាស់ជាងមុន។

២. ស្បែកនឹងកាន់តែងាយរងគ្រោះដោយសារបរិយាកាសខាងក្រៅ

ទោះបីជាអាហារមានផ្ទុកជាតិស្ករខ្ពស់អាចបណ្ដាលឱ្យកើតមុនលើស្បែក ប៉ុន្តែស្ករមានសុខភាពល្អដូចជាស្ករអំពៅអាចផ្ដល់អត្ថប្រយោជន៍គួរឱ្យកត់សម្គាល់ចំពោះសុខភាពស្បែក។ ស្ករអំពៅ គឺមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលការពារស្បែកប្រឆាំងរ៉ាឌីកាល់សេរី។ អ្នកក៏អាចទទួលបានស្បែកភ្លឺរលោងស្រស់ថ្លាពីការទទួលទានស្ករសូកូឡាខ្មៅពី ២ ទៅ ៣ដុំតូចៗផងដែរ។

៣. កើនទម្ងន់

របបអាហារដែលគ្មានជាតិស្ករទាំងស្រុងអាចបណ្ដាលឱ្យអ្នកមានអារម្មន៍ឃ្លានផ្អែម ឬអាហារសម្បូរជាតិស្ករកាន់តែខ្លាំងដែលអាចធ្វើឱ្យអ្នកញ៊ាំច្រើនលើសកម្រិត។ ការទទួលទានស្ករសូកូឡាខ្មៅក្នុងកម្រិតមធ្យមអាចផ្ដល់ឱ្យអ្នកនូវអារម្មណ៍ឆ្អែត និងមិនអាចញ៊ាំច្រើនលើសឡើយ។ រីឯស្ករអំពៅវិញអាចផ្ដល់ឱ្យអ្នកនូវជាតិផ្អែមឆ្ងាញ់ និងបង្កើនការដុតរំលាយអាហារក្នុងរាងកាយ ងាយនឹងស្រកទម្ងន់។

៤. ភាពឆាប់ប្រែប្រួលនៃអារម្មណ៍កាន់តែអាក្រក់ឡើង

ការផ្លាស់ប្ដូររបបអាហារខុសពីមុនខ្លាំងភ្លាមៗ គឺមិនផ្ដល់ភាពងាយស្រួលសម្រាប់អ្នកឡើយ ជាពិសេសនៅពេលផ្ដាច់ជាតិស្ករទាំងស្រុងតែម្ដង។ ការសិក្សាស្រាវជ្រាវជាច្រើនបានឱ្យដឹងថា ការទទួលទានស្ករសូកូឡាខ្មៅ​បន្តិចជាប្រចាំអាចជួយកាត់បន្ថយកម្រិតនៃភាពស្ត្រេសនិងធ្វើឱ្យអ្នកមានអារម្មណស្ងប់ ហើយប្រសើរជាងមុន។

៥. ពិបាកនឹងផ្ដោតអារម្មណ៍

ស្ករសូកូឡាខ្មៅអាចជួយធ្វើឱ្យលំហូរឈាមទៅកាន់ខួរក្បាលមានភាពប្រសើរឡើយ ហើយការទទួលទានវាក្នុងកម្រិតមធ្យម គឺអាចផ្ដល់ផលល្អៗចំពោះសុខភាពរាងកាយ និងខួរក្បាល។

ណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕