ស្បែកមុខខ្មៅ ឬ ប្រែពណ៌ ព្រោះកំដៅថ្ងៃ? ល្ហុងទុំ និងទឹកឃ្មុំ ជួយព្យាបាលបានយ៉ាងឆាប់

ចង់ដោះស្រាយបញ្ហាស្បែកមុខខ្មៅ ឬប្រែពណ៌ស្រអាប់ជាងមុនព្រោះកម្ដៅថ្ងៃ? មិនពិបាកឡើយ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តធម្មជាតិជួយព្យាបាលស្បែកមុខដែលប្រែពណ៌ព្រោះត្រូវថ្ងៃ ៖

១. ប្រទាលកន្ទុយក្រពើ, ទឺកឃ្មុំ និងរមៀត

អ្វីដែលអ្នកត្រូវធ្វើ គឺគ្រាន់តែលាយជែលប្រទាលកន្ទុយក្រពើស្រស់ ៣ស្លាបព្រាបាយជាមួយទឹកឃ្មុំ ២ស្លាបព្រាបាយ និងម្សៅរមៀត ឬរមៀតម៉ដ្ឋ ១ស្លាបព្រាកាហ្វេ។ កូរឱ្យសព្វ សឹមលាបម៉ាស្សាល្បាយលើស្បែកមុខដែលទើបលាងសម្អាតរួចនៅសើមៗ។ រងចាំសម្រាប់រយៈពេលពី ១០ ទៅ ១៥ នាទី សឹមលាងសម្អាតចេញជាមួយទឹកធម្មតា។ អនុវត្តម្ដងក្នុងមួយសប្តាហ៍។

២. ប៉េងប៉ោះ

អ្វីដែលអ្នកត្រូវធ្វើ គឺដំបូងដាក់កូនកន្សែងសើមដែលក្ដៅឧណ្ហៗតូចមួយលើស្បែកមុខសម្រាប់រយៈពេល ៥នាទី។ បន្ទាប់មកសឹមលាបម៉ាស្សាសាច់ប៉េងប៉ោះស្រស់ៗដែលកិនរាងម៉ដ្ឋខាប់ៗប្រមាណ ៣ស្លាបព្រាបាយលើស្បែកមុខ និងរងចាំសម្រាប់រយៈពេលពី ១៥ ទៅ ២០នាទី សឹមលាងសម្អាតចេញជាមួយទឹកធម្មតា។ អនុវត្តម្ដងក្នុងមួយសប្តាហ៍ជាការស្រេច។

៣. ម្សៅទឹកដោះគោ, ទឹកឃ្មុំ និងទឹកក្រូចឆ្មារស្រស់

អ្វីដែលអ្នកត្រូវធ្វើ គឺគ្រាន់តែលាយម្សៅទឹកដោះគោ ២ស្លាបព្រាបាយជាមួយទឹកឃ្មុំ ១ស្លាបព្រាបាយ និងទឹកក្រូចឆ្មារស្រស់ពី ១ ទៅ ២ស្លាបព្រាបាយឱ្យសព្វចូលគ្នា។ លាបល្បាយលើស្បែកមុខ និងរងចាំសម្រាប់រយៈពេល ៣០នាទី សឹមលាងសម្អាតចេញជាមួយទឹកត្រជាក់។ អនុវត្តម្ដងក្នុងមួយសប្តាហ៍។

៤. ល្ហុង, ក្រូចឆ្មារ និងទឹកឃ្មុំ

អ្វីដែលអ្នកត្រូវធ្វើ គឺគ្រាន់តែលាយសាច់ល្ហុងទុំ ១ស្លាបព្រាបាយជាមួយទឹកឃ្មុំ ១ស្លាបព្រាបាយ និងទឹកក្រូចឆ្មារស្រស់ ១ស្លាបព្រាបាយឱ្យសព្វចូលគ្នាក្លាយជាល្បាយខាប់ៗ។ លាបម៉ាស្សាល្បាយឱ្យពេញលើស្បែកមុខ និងរងចាំសម្រាប់រយៈពេលពី ១០ ទៅ ១៥នាទី សឹមលាងសម្អាតចេញជាមួយទឹកត្រជាក់។ អនុវត្តម្ដងក្នុងមួយសប្តាហ៍។

៥. ក្រូចឆ្មារ និងស្ករស

អ្វីដែលអ្នកត្រូវធ្វើ គឺគ្រាន់តែលាយស្ករស ១ស្លាបព្រាបាយជាមួយទឹកក្រូចឆ្មារស្រស់ ១ស្លាបព្រាបាយឱ្យសព្វចូលគ្នាក្លាយជាល្បាយខាប់ៗ។ លាបម៉ាស្សាល្បាយលើស្បែកមុខ និងខាត់ថ្នមៗ។ រងចាំសម្រាប់រយៈពេលពី ៥ ទៅ ១០នាទី សឹមលាងសម្អាតចេញជាមួយទឹកធម្មតា។ អនុវត្តម្ដងក្នុងមួយថ្ងៃ។

៦. ល្ហុង និងទឹកឃ្មុំ

អ្វីដែលអ្នកត្រូវធ្វើ គឺគ្រាន់តែលាយសាច់ល្ហុងទុំ ១ស្លាបព្រាបាយជាមួយទឹកឃ្មុំ ១ស្លាបព្រាបាយឱ្យសព្វចូលគ្នាក្លាយជាល្បាយខាប់ៗ។ បន្ទាប់មកសឹមលាបម៉ាស្សាល្បាយលើស្បែកមុខ និងរងចាំសម្រាប់រយៈពេលពី ១០ ទៅ ១៥នាទី សឹមលាងសម្អាតចេញជាមួយទឹកត្រជាក់។ អនុវត្តម្ដងក្នុងមួយថ្ងៃ។

៧. ប៉េងប៉ោះ, យ៉ាអួរ និងទឹកក្រូចឆ្មារស្រស់

អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ ១ស្លាបព្រាបាយជាមួយយ៉ាអួរ ១ស្លាបព្រាបាយ និងសាច់ប៉េងប៉ោះដែលកិនរួចម៉ដ្ឋៗ ១ស្លាបព្រាបាយឱ្យសព្វចូលគ្នា។ បន្ទាប់មកសឹមលាបម៉ាស្សាល្បាយលើស្បែកមុខ និងរងចាំសម្រាប់រយៈពេលពី ១០ ទៅ ១៥នាទី សឹមលាងសម្អាតចេញជាមួយទឹកត្រជាក់។ អនុវត្តម្ដងក្នុងមួយថ្ងៃ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕