ប្រយ័ត្ន! បើញ៊ាំច្រើនពេក “ទឹកឃ្មុំ” អាចបង្កគ្រោះថ្នាក់សុខភាព ៥ នេះ (ក្មេងក្រោម ១ឆ្នាំអាចស្លាប់)

ទឹកឃ្មុំ គឺជាគ្រឿងផ្សំដែលមានលក្ខណៈសម្បត្តិសំខាន់ៗចំពោះសុខភាព។ ទោះជាយ៉ាងណាការទទួលទានលើសកម្រិតអាចបង្កជាបញ្ហាសុខភាពគួរឱ្យបារម្ភ! ប្រសិនបើអ្នកកំពុងជួបប្រទះបញ្ហាសុខភាពណាមួយ ចូរពិគ្រោះជាមួយគ្រូពេទ្យសិនមុននឹងទទួលទានទឹកឃ្មុំ។ ថាតើគ្រោះថ្នាក់ទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរប្រយ័ត្ននៅពេលទទួលទានទឹកឃ្មុំ ៖

១. អាចបណ្ដាលឱ្យទារកកើតជំងឺ Botulism

ជំងឺកម្រនេះកើតឡើងនៅពេលទារកបានទទួលទាននូវស្ព័រ (Spore) របស់បាក់តេរីម្យ៉ាងហៅថា Clostridium Botulinum ដែលមានផ្ទុកក្នុងទឹកឃ្មុំ ហើយបាក់តេរីនេះលូតលាស់ក្នុងប្រព័ន្ធរំលាយអាហារ ឬពោះវៀនរបស់ក្មេង រួចក្រោយបញ្ចេញនូវជាតិពុលគ្រោះថ្នាក់បង្កជាបញ្ហាគួរឱ្យបារម្ភអាចបណ្ដាលឱ្យស្លាប់បាន។ ការសិក្សាស្រាវជ្រាវជាច្រើនបានណែនាំថា អ្នកមិនត្រូវឱ្យក្មេងក្រោមអាយុ ១ឆ្នាំទទួលទានទឹកឃ្មុំជាដាច់ខាត។ រោគសញ្ញានៃជំងឺ Botulinum លើទារករួមមានទល់លាមក, គ្មានកម្លាំង, ធ្លាក់ត្របកភ្នែក, មិនអាចគ្រប់គ្រងទឹកមុខនិងក្បាលបាន, យំខ្សោយៗ, បញ្ហាសាច់ដុំ និងបញ្ហាផ្លូវដង្ហើម។

២. នាំឱ្យកើនទម្ងន់

មួយស្លាប់ព្រាបាយនៃទឹកឃ្មុំ (ប្រមាណ ២១ក្រាម) មានផ្ទុកកាឡូរី ៦៤ កាឡូរីដែលខ្ពស់ណាស់ដែរ។ ដូច្នេះការទទួលទានទឹកឃ្មុំ ១ស្លាបព្រាបាយរាល់ថ្ងៃគួបផ្សំនឹងការមិនធ្វើលំហាត់ប្រាណ ឬផ្លាស់ប្ដូររបៀបរស់នៅគ្មានសុខភាពល្អចេញទេនោះ អ្នកប្រាកដជាឡើងទម្ងន់ដែលមិនចង់បាន។ ទឹកឃ្មុំក៏ត្រូវបានប្រើជាជាតិស្ករបន្ថែមក្នុងអាហារផ្សេងៗនិងភេសជ្ជៈកំឡុងពេលផលិតផងដែរ។ ការទទួលទានស្ករបន្ថែមញឹកញាប់ និងលើសកម្រិតត្រូវបានផ្សារភ្ជាប់នឹងការកើនទម្ងន់។ ដូច្នេះការកាត់បន្ថយការទទួលទានស្ករបន្ថែមជាទូទៅត្រូវបានផ្សារភ្ជាប់នឹងការថយចុះនៃទម្ងន់។ ដើម្បីជាការប្រសើរអ្នកគួរកម្រិតការទទួលទានជាតិស្ករប្រចាំថ្ងៃឱ្យនៅក្រោម ១០ភាគរយនៃកាឡូរីសរុប។

៣. បង្កបញ្ហាប្រតិកម្មអាឡែកស៊ី

ទោះបីការអាឡែកស៊ីនឹងទឹកឃ្មុំ គឺកម្រ ប៉ុន្តែនៅតែអាចកើតមានប្រសិនបើអ្នកទទួលទានអាហារដែលមានផ្ទុកទឹកឃ្មុំ ឬញ៊ាំទឹកឃ្មុំផ្ទាល់តែម្ដងច្រើនពេក។ បុគ្គលដែលអាឡែកស៊ីនឹងលំអងផ្កាអាចនឹងអាឡែកស៊ីជាមួយទឹកឃ្មុំដូចគ្នា។ បញ្ហាអាឡែកស៊ីនឹងទឹកឃ្មុំអាចបង្កជាស្ថានភាពមួយគ្រោះថ្នាក់ចំពោះអាយុជីវិតហៅថា anaphylaxis។ រោគសញ្ញារួមមានរោលកន្ទួលក្រហមលើស្បែក ឬកន្ទាលត្រអាក, ហើមមុខ, ក្អួត, ចង្អោរចង់ក្អួត, ពិបាកដកដង្ហើម និងញ័រទ្រូងជាដើម។

៤. បង្កើនកម្រិតនៃជាតិស្ករក្នុងឈាម

ទោះបីជាទឹកឃ្មុំ គឺជាជាតិផ្អែមដែលល្អជាងស្ករសធម្មតា ប៉ុន្តែវានៅតែមានផ្ទុកជាតិស្ករ។ ការសិក្សាស្រាវជ្រាវជាច្រើនបានបញ្ចាក់ថា អ្នកជំងឺទឹកនោមផ្អែមគួរប្រយ័ត្នក្នុងការទទួលទានទឹកឃ្មុំ។ ការញ៊ាំទឹកឃ្មុំយូរទៅអាចបង្កើនកម្រិតនៃ hemoglobin A1C (អេម៉ូក្លូនប៊ីនដែលមានទំនាក់ទំនងនឹងជាតិស្ករគ្លុយកូស) ក្នុងឈាម។ កម្រិតនៃ hemoglobin A1C ខ្ពស់បង្កើនហានិភ័យនៃជំងឺទឹកនោមផ្អែម។ ដូច្នេះដើម្បីជាការប្រសើរ ចូរកម្រិតការទទួលទានទឹកឃ្មុំរបស់អ្នក។ ក្នុងករណីអ្នកកំពុងជួបប្រទះបញ្ហានៃជំងឺទឹកនោមផ្អែម ចូរពិគ្រោះជាមួយគ្រូពេទ្យសិនមុននឹងទទួលទាន ឬរួមបញ្ចូលទឹកឃ្មុំក្នុងរបបអាហារប្រចាំថ្ងៃ។

៥. អាច​បង្កបញ្ហាដង្កូវស៊ីធ្មេញ

ទឹកឃ្មុំមានផ្ទុកជាតិស្ករ និងមានភាពស្អិតដែលអាចបង្កើនហានិភ័យនៃជំងឺពុកធ្មេញ ឬដង្កូវស៊ីធ្មេញនៅពេលទទួលទានយូរទៅ ហើយអ្នកមិនបានលាងសម្អាតក្នុងមាត់ឱ្យបានត្រឹមត្រូវក្រោយញ៊ាំ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕