៥មូលហេតុធ្វើឱ្យការញ៊ាំ “កាហ្វេ” ពេលព្រឹក ល្អជាងផឹក “តែ”

កាហ្វេនិងតែ គឺជាភេសជ្ជៈ ២ប្រភេទដែលមនុស្សនៅទូទាំងពិភពលោកពេញនិយមទទួលទាននៅពេលព្រឹក។ ទៅជាយ៉ាងណាការជ្រើសរើសទទួលទានកាហ្វេនៅពេលព្រឹក គឺអាចផ្ដល់អត្ថប្រយោជន៍ល្អជាងតែ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរញ៊ាំកាហ្វេនៅពេលព្រឹក ៖

១. កាហ្វេនឹងជួយឱ្យអ្នកធ្វើលំហាត់ប្រាណបានកាន់តែប្រសើរ

ប្រសិនបើអ្នកមានទម្លាប់ក្រោកឡើងហាត់ប្រានជាប្រចាំនៅពេលព្រឹក នោះការជ្រើសរើសទទួលទានកាហ្វេ គឺជាជម្រើសដ៏ត្រឹមត្រូវបំផុតសម្រាប់អ្នក។ នេះក៏ព្រោះតែកាហ្វេមានផ្ទុកជាតិកាហ្វេអ៊ីនច្រើនជាងទឹកតែដែលអាចជម្រុញសកម្មភាពរាងកាយ និងកាត់បន្ថយភាពអស់កម្លាំងពីការធ្វើលំហាត់ប្រាណ។

២. កាហ្វេនឹងធ្វើឱ្យអ្នកផ្ដោតអារម្មណ៍បានកាន់តែប្រសើរ

អ្នកកំពុងត្រូវការប្រមូលផ្ដុំអារម្មណ៍ដើម្បីសិក្សាសម្រាប់ត្រៀមប្រឡង ឬចូលរួមសកម្មភាពណាមួយដែលទាមទារឱ្យការផ្ដោតអារម្មណ៍ខ្ពស់? ក្នុងករណីនេះកាហ្វេអាចជួយដល់អ្នកបាន! ភេសជ្ជៈនេះមានផ្ទុកបរិមាណនៃកាហ្វេអ៊ីនដែលអាចជួយឱ្យអ្នកស្វាង និងអាចធ្វើសកម្មភាពហ្វឹកហាត់កំឡុងពេលយប់បានយ៉ាងងាយ។ កាហ្វេក៏នឹងជួយឱ្យអ្នកអាចផ្ដោតអារម្មណ៍លើភារកិច្ចចាំបាច់ ហើយស្វាងបានយូរ។

៣. កាហ្វេនឹងផ្ដល់ឱ្យអ្នកនូវកម្លាំងជម្រុញភ្លាមៗ

តែ គឺជាភេសជ្ជៈមួយប្រភេទដែលមានផ្ទុកកាហ្វេអ៊ីនទាបនិងសារធាតុ L-theanine ដែលជួយផ្ដល់ឱ្យអ្នកនូវអារម្មណ៍ធូរស្រាល ព្រមទាំងកាត់បន្ថយអាការៈអស់កម្លាំង។ ដូច្នេះការទទួលទានភេសជ្ជៈ ឬអាហារដែលមានផ្ទុកបរិមាណនៃកាហ្វេខ្ពស់ដូចជាកាហ្វេវិញនឹងអាចផ្ដល់ឱ្យអ្នកនូវថាមពលភ្លាមៗក្នុងរយៈពេលត្រឹមតែ ១៥នាទីក្រោយទទួលទានប៉ុណ្ណោះ។

៤. កាហ្វេអាចជួយឱ្យអ្នកស្រកទម្ងន់

ការសិក្សាស្រាវជ្រាវជាច្រើនបានលើកឡើងថា ការទទួលទានកាហ្វេ គឺមានទំនាក់ទំនងផ្សារភ្ជាប់នឹងការថយចុះនូវកន្រិតនៃជាតិខ្លាញ់ ជាពិសេសចំពោះបុរស។ ជាតិអាស៊ីត chlorogenic ក្នុងកាហ្វេអាចជួយកាត់បន្ថយទម្ងន់នៃរាងកាយ, ដូច្នេះសម្រាប់អ្នកដែលកំពុងចង់បានរាងស្លីមចូរកុំភ្លេចទទួលទានកាហ្វេ។

៥. កាហ្វេអាចកាត់បន្ថយហានិភ័យនៃជំងឺទឹកនោមផ្អែម

ការសិក្សាស្រាវជ្រាវមួយបានចង្អុលបង្ហាញឱ្យដឹងថា កាហ្វេអ៊ីននឹងបន្ថយហានិភ័យនៃការកើតជំងឺទឹកនោមផ្អែម។ ត្រឹមតែ ៣ពែងនៃកាហ្វេក្នុងមួយថ្ងៃនឹងជួយកាត់បន្ថយហានិភ័យនៃជំងឺនេះដល់ទៅ ៤២ភាគរយឯណោះដែលគួរឱ្យចាប់អារម្មណ៍មែនទែន! ក្នុងការសិក្សាស្រាវជ្រាវមួយទៀតបានបង្ហាញថា កាហ្វេមានផ្ទុកកាហ្វេអ៊ីនអាចមានឥទ្ធិពលកាត់បន្ថយហានិភ័យនៃជំងឺទឹកនោមផ្អែមប្រភេទទី ២ទៀតផង។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕