ប្រយ័ត្ន! គេងបើកភ្លើង អាចបង្កជំងឺបេះដូង និងបញ្ហាសុខភាព ៤នេះ

ភាគច្រើននៃពួកយើងប្រហែលជាមិនធ្លាប់ដឹងទេថា គ្រាន់តែការគេងបើកភ្លើងក៏អាចជះផលប៉ះពាល់គួរឱ្យកត់សម្គាល់ចំពោះសុខភាពផងដែរ។ មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកមិនគួរគេងបើកភ្លើង ៖

១. វាអាចបង្កបញ្ហាផ្សេងៗពាក់ព័ន្ធនឹងបេះដូង

មេឡាតូនីនមិនត្រឹមតែបន្ថយសីតុណ្ហភាពនៃរាងកាយប៉ុណ្ណោះទេ ប៉ុន្តែក៏មានឥទ្ធិពលលើសម្ពាធឈាមផងដែរ។ ប្រសិនបើអ្នកបានប៉ះពាល់នឹងពន្លឺសិប្បនិម្មិត្តនៅពេលយប់, ការផលិតមេឡាតូនីននឹងត្រូវបំបិទចោល។ ជាលទ្ធផលសម្ពាធឈាមនឹងកើនឡើងខ្ពស់។ ភាពប្រែប្រួលនៃសម្ពាធឈាមអាចបង្កើនហានិភ័យនៃជំងឺបេះដូងនិងដាច់សសៃឈាមខួរក្បាល។

២. វាអាច​បង្កគ្រោះថ្នាក់ដល់សុខភាពប្រព័ន្ធបន្តពូជ

ការសិក្សាស្រាវជ្រាវមួយបានរកឃើញថា ការប៉ះពាល់នឹងពន្លឺសិប្បនិម្មត្តិនៅពេលយប់អាចបង្កើនហានិភ័យនៃភាពគ្មានកូន។ គេបានធ្វើការពិសោធន៍លើកណ្ដុរញីដែលដេកដោយបើកភ្លើងនៅពេលយប់ប្រឈមខ្ពស់នឹងភាពគ្មានកូន។ វាក៏ត្រូវបានគេជឿចង្វាក់ circadian ឬម៉ោងក្នុងរាងកាយជះឥទ្ធិពលលើដំណើរការបន្តពូជរបស់ស្ត្រី។ ការសិក្សាស្រាវជ្រាវមួយទៀតលើគិលានុបដ្ឋាយិកាដែលបម្រើការងារនៅពេលយប់ និងផលប៉ះពាល់នៃពន្លឺសិប្បនិម្មិត្តបានបង្ហាញថា គិលានុបដ្ឋាយិកាភាគច្រើនជួបប្រទះបញ្ហាពាក់ព័ន្ធនឹងភាពរអាក់រអួលនៃវដ្តរដូវរបស់ពួកគេ។

៣. ធ្វើឱ្យកើនទម្ងន់

សម្រាប់មនុស្សមួយចំនួនការគេងបើកភ្លើងអាចជួយឱ្យងាយនឹងគេងលក់ ប៉ុន្តែប្រសិនបើអ្នកចង់ដុតបំផ្លាញជាតិខ្លាញ់ចូរគេងបិទភ្លើងទើបប្រសើរ។ នោះក៏ព្រោះតែពន្លឺសិប្បនិម្មិត្តសូម្បីតែបន្តិចក្នុងបន្ទប់គេងអាចបង្អាក់រាងកាយក្នុងការផលិតអ័រម៉ូនមេឡាតូនីនដែលមិនត្រឹមតែជះឥទ្ធិពលដល់ការគេងប៉ុណ្ណោះទេ ប៉ុន្តែក៏រារាំងដល់ការដុតបំផ្លាញកាឡូរីផងដែរ។ វាថែមទាំងពន្យឺតការដុតរំលាយអាហារគួរឱ្យកត់សម្គាល់។

៤. វាអាចបណ្ដាលឱ្យអ័រម៉ូនប្រែប្រួល

សូម្បីតែប្រភពពន្លឺតែមួយក៏ដោយ ក៏អាចបង្កបញ្ហាអតុល្យភាពអ័រម៉ូនបានដែរ។ ពន្លឺចេញពីទូរស័ព្ទ, ទូរទស្សន៍ ឬកុំព្យូទ័រអាចបង្កបញ្ហាកង្វះមេឡាតូនីន។ នៅពេលមេឡាតូនីនមានបញ្ហាវាបង្កការរំខានដល់ដំណេកដែលអាចបង្កើនភាពចាស់នៃអ័រម៉ូន និងកាត់បន្ថយភាពចាស់តាមវ័យ។

៥. អាចទទួលរងបញ្ហានៃជំងឺធ្លាក់ទឹកចិត្ត

ការសិក្សាស្រាវជ្រាវមួយបានបង្ហាញថាការប៉ះពាល់នឹងពន្លឺសិប្បនិម្មិត្តនៅពេលយប់អាចបង្កើនហានិភ័យនៃជំងឺធ្លាក់ទឹកចិត្ត។ ការរំខានដល់ចង្វាក់ circadian ឬម៉ោងក្នុងរាងកាយអាចធ្វើឱ្យរោគសញ្ញានៃជំងឺធ្លាក់ទឹកចិត្តដែលមានស្រាប់កាន់តែធ្ងន់ឡើង។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕