អាហារសម្បូរសេលេញ៉ូមដូច បង្គា អាចទប់ស្កាត់មហារីកសួត និងផ្ដល់ផលល្អ ៤នេះចំពោះសុខភាព

សេលេញ៉ូម selenium ជាជាតិរ៉ែមួយប្រភេទដែលអាចផ្ដល់អត្ថប្រយោជន៍ច្រើនណាស់ចំពោះសុខភាពរាងកាយ។ តម្រូវការចាំបាច់ប្រចាំថ្ងៃនៃជាតិរ៉ែនេះសម្រាប់មនុស្សពេញវ័យ គឺ ០.០៥៥មីលីក្រាមក្នុងមួយថ្ងៃ។ បរិមាណខ្ពស់បំផុតនៃជាតិរ៉ែនេះក្នុងមួយថ្ងៃ គឺ ០.៤មីលីក្រាម បើលើសពីនេះអាចបង្កជាបញ្ហាពុលសេលេញ៉ូមបាន។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកចាំបាច់គួរទទួលទានអាហារសម្បូរសេលេញ៉ូម ៖

១. ជួយទប់ស្កាត់ជំងឺមហារីក

ជាតិរ៉ែសេលេញ៉ូមបង្ហាញសកម្មភាពប្រឆាំងនឹងជំងឺមហារីកសុដន់, មហារីកសួត, មហារីកក្រពេញប្រូស្តាត, មហារីកពោះវៀនធំ និងមហារីកស្បែក។ ទោះជាយ៉ាងណាជាតិរ៉ែនេះត្រូវបានរកឃើញថាមានឥទ្ធិពលខ្លាំងណាស់លើការទប់ស្កាត់ជំងឺមហារីកក្រពេញប្រូស្តាត។ នេះក៏ព្រោះតែសេលេញ៉ូមមានទំនាក់ទំនងផ្សារភ្ជាប់យ៉ាងជិតស្និតជាមួយនឹងសមាសធាតុម្យ៉ាងហៅថា selenoproteins។

២. ពង្រឹងសុខភាពសសៃឈាមបេះដូង

សេលេញ៉ូមអាចជួយកាត់បន្ថយហានិភ័យនៃជំងឺសសៃឈាមបេះដូងតាមរយៈលក្ខណៈសម្បត្តិប្រឆាំងអុកស៊ីតកម្មដែលវាមានផ្ទុក។ បន្ថែមពីនេះ selenoproteins នៃសេលេញ៉ូមជួយទប់ស្កាត់ការឡើងកម្រិតនៃកូឡេស្តេរ៉ូលមិនល្អ, ការរលាកសសៃឈាម និងជំងឺក្រិនសសៃឈាមអាកទែ។ វាក៏ជួយសម្រាលភាពស្ត្រេសក្នុងបេះដូងតាមរយៈការប្រយុទ្ធប្រឆាំងនឹងប្រភេទអុកស៊ីសែនដែលមានប្រតិកម្មក្នុងបេះដូង។

៣. ល្អសម្រាប់សុខភាពខួរក្បាល

សមាសធាតុ selenoproteins នៃសេលេញ៉ូមជួយប្រឆាំងដំណើរការ oxidative stress ដែលជួយទប់ស្កាត់បញ្ហាធ្លាក់ចុះនៃមុខងារយល់ដឹងពាក់ព័ន្ធនឹងកត្តាវ័យ។ ក្នុងករណីកង្វះសេលេញ៉ូមក្នុងរាងកាយ គឺមានតែខួរក្បាលប៉ុណ្ណោះដែលជាសរីរាង្គផ្ទុកជាតិរ៉ែបានយូរបំផុត។ នេះជាលទ្ធផលបង្ហាញពីតួនាទីនៃសេលេញ៉ូមក្នុងសុខភាពខួរក្បាល។ ជាតិរ៉ែសេលេញ៉ូមក៏ដើរតួនាទីក្នុងការសំយោគ glutathione peroxidases ដែលជាអង់ស៊ីមប្រឆាំងអុកស៊ីតកម្មសំខាន់បំផុតមួយក្នុងជាលិកាខួរក្បាល។ អង់ស៊ីម​ទាំងនេះកាត់បន្ថយការប្រមូលផ្ដុំប្រភេទនៃអុកស៊ីសែនដែលបង្កប្រតិកម្មក្នុងខួរក្បាល។

៤. ធ្វើឱ្យមុខងារនៃក្រពេញទីរ៉ូអ៊ីតកាន់តែមានលក្ខណៈប្រសើរឡើង

ក្រពេញទីរ៉ូតអ៊ីតមានផ្ទុកបរិមាណសេលេញ៉ូមខ្ពស់បំផុតក្នុងមួយក្រាមនៃជាលិកា។ ការសិក្សាស្រាវជ្រាវមួយចំនួនបង្ហាញថាការទទួលទានសេលេញ៉ុមអាចជួយជម្រុញមុខងារទីរ៉ូអ៊ីត ជាពិសេសសម្រាប់បុគ្គលិកដេលមានបញ្ហាក្រពេញទីរ៉ូអ៊ីត។ ការរក្សាឱ្យបាននូវបរិមាណសូដ្យូមគ្រប់គ្រាន់ប្រចាំថ្ងៃអាចសូម្បីតែទប់ស្កាត់ជំងឺក្រពេញទីរ៉ូអ៊ីត។ បន្ថែមពីនេះប្រូតេអ៊ីនផ្សារភ្ជាប់នឹងសេលេញ៉ុមដើរតួនាទីក្នុងការគ្រប់គ្រងសកម្មភាពនៃអ័រម៉ូនទីរ៉ូអ៊ីត។

៥. ពង្រឹងប្រព័ន្ធភាពស៊ាំរាងកាយ

សេលេញ៉ូមអាចជួយពង្រឹងភាពស៊ាំរាងកាយតាមរយៈសមាសធាតុ selenoproteins របស់វា។ សេលេញ៉ុមមិនត្រឹមតែពង្រឹងប្រព័ន្ធភាពស៊ាំតែមួយមុខប៉ុណ្ណោះទេ ប៉ុន្តែវាក៏គ្រប់គ្រងការឆ្លើយតបលើសកម្រិតនៃប្រព័ន្ធភាពស៊ាំនិងការរលាករ៉ាំរ៉ៃផងដែរ។ ជាតិរ៉ែនេះក៏មានឥទ្ធិពលលើគ្រប់សមាសធាតុទាំងអស់នៃប្រព័ន្ធភាពស៊ាំរាងកាយផងដែរ។

• អាហារដែលជាប្រភពដ៏ប្រសើរបំផុតនៃសេលេញ៉ូមរួមមាន ៖

– គ្រឿងសមុទ្រ ជាពិសេសបង្គា

– សាច់គ្រឿងក្នុង

– សាច់គោ

– សាច់មាន់

– ស៊ុត

– ត្រី

– សាច់ជ្រូក

– ទឹកដោះគោ

– ផ្កាខាត់ខៀវ និងបន្លែផ្សេងៗជាដើម។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕