ប្រយ័ត្ន! ចេក និងអាហារ ៥មុខនេះ ហ៊ានតែញ៊ាំពេលពោះទទេរ អាចបង្កគ្រោះថ្នាក់មិនខាន

ភាគច្រើននៃពួកយើងប្រហែលជាមិនធ្លាប់ចាប់អារម្មណ៍ទេថាមិនមែនគ្រប់អាហារនិងភេសជ្ជៈទាំងអស់សុទ្ធតែអាចទទួលទានបានគ្រប់ពេលដោយគ្មានបញ្ហាឡើយ! ថាតើមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលមិនគួរញ៊ាំពេលពោះទទេរ ​៖

១. ចេក

ការទទួលទានផ្លែឈើនេះនៅពេលពោះទទេរមិនមែនជាគំនិតល្អឡើយ! វាពិតណាស់ដែលផ្លែចេកជាប្រភពដ៏ប្រសើរនៃប៉ូតាស្យូម, ជាតិសសៃ និងម៉ាញ៉េស្យូម ប៉ុន្តែវាក៏មានផ្ទុកជាតិអាស៊ីតនិងស្ករច្រើនផងដែរ។ ការទទួលទានអាហារមានផ្ទុកជាតិអាស៊ីតនៅពេលពោះទទេរអាចបង្កបញ្ហាពោះវៀន និងបង្កើនកម្រិតនៃជាតិស្ករធ្វើឱ្យអ្នកមានអារម្មណ៍ងងុយគេង ហើយឆាប់អស់ថាមពលនៅរយៈពេលពី ២ ទៅ ៣ម៉ោងក្រោយ។ បញ្ហាទាំងនេះនឹងត្រូវបានដោះស្រាយប្រសិនបើអ្នកញ៊ាំចេកលាយជាមួយអាហារផ្សេងទៀត។

២. ភេសជ្ជៈត្រជាក់

ភេសជ្ជៈត្រជាក់ៗគ្រប់ប្រភេទនៅពេលទទួលទានកំឡុងពេលមិនទាន់ញ៊ាំអ្វីផ្សេងអាចបង្កជាការរលាកដល់ក្រពះនិងពោះវៀន។ គួរឱ្យបារម្ភជាពិសេសនោះ គឺភេសជ្ជៈកាបូណាតត្រជាក់, ខណដែលវាអាចបង្កអាការៈហើមពោះនិងអារម្មណ៍មិនស្រួលក្នុងក្រពះ។ ដូច្នេះដើម្បីជាការប្រសើរ អ្នកគួរជ្រើសរើសទទួលទានទឹកក្ដៅឧណ្ហៗ ១កែវជំនួសវិញនៅពេលព្រឹកមុនញ៊ាំអាហារផ្សេងៗ ខណៈដែលវានឹងជួយសម្រួលដល់ការរំលាយអាហារ, ចរន្តឈាមរត់ និងជួយឱ្យស្រកទម្ងន់។

៣. យ៉ាអួរ

វាអាចជាគំនិតល្អមួយក្នុងការទទួលទានយ៉ាអួរលាយជាមួយផ្លែឈើសម្រាប់អាហារពេលព្រឹកដែលមានសុខភាពល្អ និងជួយឱ្យស្រកទម្ងន់។ ទោះជាយ៉ាងណាអ្នកគួរដឹងថា មិនមែនគ្រប់ប្រភេទនៃយ៉ាអួរសុទ្ធតែជាជម្រើសល្អឡើយ។ យ៉ាអួរភាគច្រើនមានផ្ទុកសម្បូរដោយជាតិស្ករបន្ថែម ប៉ុន្តែប្រូតេអ៊ីនទាប។ ជម្រើសដ៏ល្អបំផុតនោះ គឺការជ្រើសរើសទទួលទានយ៉ាអួរប្រភេទ Greek។

៤. បន្លែបៃតងឆៅ

ទោះបីជាបន្លែបៃតងអាចផ្ដល់អត្ថប្រយោជន៍គួរឱ្យកត់សម្គាល់ជាច្រើនចំពោះសុខភាព, ប៉ុន្តែការទទួលទានវានៅពេលពោះទទេរអាចបង្កការរលាកនៅក្នុងចំណោមមនុស្សមួយចំនួន។ ជាលទ្ធផលបង្កបញ្ហាលើសជាតិហ្គាសក្នុងរាងកាយ, ហើមពោះ និងឈឺចុកពោះ។ ជាតិសសៃ insoluble ក្នុងបន្លែបៃតងជាមូលហេតុចម្បងមួយដែលអ្នកមានបញ្ហាពិបាករំលាយអាហារគួរចៀសវាង។

៥. ផ្លែឈើប្រភេទ Citrus

រួមមានផ្លែក្រូច, ក្រូចឆ្មារ និងក្រូចថ្លុងជាដើម គឺសុទ្ធតែអាចជះឥទ្ធិពលអវិជ្ជមានលើប្រព័ន្ធរំលាយអាហារនៅពេលទទួលទានកំឡុងពេលពោះទទេរ។ ការទទួលទានផ្លែឈើប្រភេទ citrus ក៏ត្រូវបានណែនាំឱ្យអ្នកជំងឺទឹកនោមផ្អែម និងអ្នកដែលមានបញ្ហាក្រពះងាយរងគ្រោះចៀសវាងផងដែរដោយសារវាមានផ្ទុកជាតិអាស៊ីតខ្ពស់។ បើញ៊ាំកំឡុងពេលពោះទទេរអាចបង្កអាការៈរលាក, ក្រហាយទ្រូង និងបញ្ហាក្រពះ។ បន្ថែមពីនេះផ្លែឈើសម្បូរកាបូអ៊ីដ្រាតអាចបង្កើនកម្រិតនៃជាតិស្ករក្នុងឈាមនៅពេលព្រឹកដែលគ្រោះថ្នាក់សម្រាប់អ្នកជំងឺទឹកនោមផ្អែម។

៦. ផ្លែសេរ៊ី

ទោះបីជាអាហារដែលមានផ្ទុកសម្បូរដោយវីតាមីន, ប៉ូតាស្យូម និងកាឡូរីទាប, ផ្លែសេរ៊ីត្រូវបានណែនាំឱ្យចៀសវាងសម្រាប់ទទួលទានជាអាហារពេលព្រឹក។ នេះក៏ព្រោះតែផ្លែឈើនេះមានផ្ទុកជាតិសសៃខ្ពស់ដែលអាចបង្កការខូចខាតភ្នាសរំអិលរបស់ក្រពះនៅពេលទទួលទានកំឡុងពេលពោះទទេរ។ ជាពិសេសសម្រាប់ផ្លែសេរ៊ីដែលរឹង។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕