ធ្លាក់ភ្នែកងងុយគេងមិនខាន ពេលញ៊ាំអាហារទាំងនេះរួច

ភាគច្រើននៃពួកយើងសុទ្ធតែធ្លាប់ជួបប្រទះនូវអាការៈចង់គេងភ្លាមៗក្រោយពេលទទួលទានអាហារ។ វាមិនមែនមកពីអ្នកចូលចិត្តគេង ឬអស់កម្លាំងក្រោយធ្វើការពិបាកនៅទេដែលអាចធ្វើឱ្យងងុយគេង ប៉ុន្តែក៏អាចបណ្ដាលមកពីប្រភេទនៃអាហារដែលអ្នកទទួលទានរាល់ថ្ងៃផងដែរ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារ ៩មុខដែលធ្វើឱ្យអ្នកងងុយគេងជាពិសេសនៅពេលញ៊ាំរួមគ្នា ៖

១. ផលិតផលអាហារផ្សំឡើងពីទឹកដោះគោ

ក្នុងចំណោមផលិតផលអាហារធ្វើឡើងពីទឹកដោះគោទាំងអស់, ឈីសរឹងអាចផ្ដល់នូវប្រសិទ្ធិភាពបន្ធូរអារម្មណ៍ប្រសើរបំផុតខណៈដែលវាមានផ្ទុកកាល់ស្យូមខ្ពស់។ ការរួមបញ្ចូលនំស្រួយជាមួយឈីសនឹងផលិតនូវប្រសិទ្ធិភាពជម្រុញឱ្យងងុយគេង ខណៈដែលកាបូអ៊ីដ្រាតធ្វើឱ្យមុខងារ tryptophan កាន់តែខ្លាំងក្លាឡើង។

២. គ្រាប់អាល់ម៉ុន

មានផ្ទុកសម្បូរទៅដោយ tryptophan ជាអាស៊ីតអាមីណូមួយប្រភេទដែលផលិតមេឡាតូនីន ឬត្រូវបានស្គាល់ថាជាអ័រម៉ូនដំណេក។ បន្ថែមពីនេះគ្រាប់ធញ្ញជាតិអាល់ម៉ុនថែមទាំងជាប្រភពដ៏ប្រសើរនៃម៉ាញ៉េស្យូមដែលផ្ដល់ភាពធូរស្បើយដល់ភាពតឹងនៃសាច់ដុំនិងធ្វើឱ្យអ្នកមានអារម្មណ៍ងងុយគេង។

៣. ផ្លែចេក

ស្ករ, ប៉ូតាស្យូម និងម៉ាញ៉េស្យូមដែលត្រូវបានរកឃើញនៅក្នុងផ្លែចេកធ្វើឱ្យ tryptophan ងាយជ្រាបចូលក្នុងខួរក្បាលនិងធ្វើឱ្យងងុយគេង។

៤. គ្រាប់វ៉ាល់ណឺត

គ្រាប់ធញ្ញជាតិនេះមានផ្ទុក tryptophan តិចជាងគ្រាប់អាល់ម៉ុន ប៉ុន្តែវាមានប្រភពនៃមេឡាតូនីនផ្ទាល់ខ្លួន។ ការសិក្សាស្រាវជ្រាវបានបង្ហាញថា គ្រាប់វ៉ាល់ណឺតបង្កើនកម្រិតនៃអ័រម៉ូននេះក្នុងឈាមហើយធ្វើឱ្យអ្នកងងុយគេង។

៥. គ្រាប់ល្ពៅ

បន្ថែមពីលើសារធាតុ tryptophan​, គ្រាប់ល្ពៅមានផ្ទុកបរិមាណនៃជាតិស័ង្កសី និងម៉ាញ៉េស្យូមខ្ពស់ដែលសមាសធាតុទាំងនេះធ្វើឱ្យអ្នកស្ងប់អារម្មណ៍ និងទទួលបាននូវភាពធូរស្រាល។ ជាលទ្ធផលអ្នកប្រាកដជាពិបាកនឹងទប់ទល់ជាមួយភាពងងុយគេងបានណាស់!

៦. តែផ្កា Chamomile

តែផ្កា Chamomile មានផ្ទុកអាស៊ីតអាមីណូ glycine ដែលផ្ដល់ភាពធូរស្រាលដល់សាច់ដុំនិងប្រព័ន្ធសសៃប្រសាទ។ មួយពែងនៃតែផ្កា Chamomile អាចធ្វើឱ្យអ្នកពិបាកនឹងទប់ភ្នែកផ្ដោតអារម្មណ៍ឱ្យស្វាងបានណាស់។

៧. បាយស

បាយសមានផ្ទុកសន្ទស្សន៍គ្លីសេមិចខ្ពស់ដែលអាចធ្វើឱ្យងងុយគេងក្នុងកំឡុងពេលពី ៣ ទៅ ៤ម៉ោងក្រោយពេលអ្នកញ៊ាំអាហាររួច។ អ្នកសិក្សាស្រាវជ្រាវជាច្រើនបានរកឃើញថា បាយអង្ករផ្កាម្លិះ អាចធ្វើឱ្យអ្នកមានអារម្មណ៍ងងុយគេងលឿនជាងបាយអង្ករប្រភេទផ្សេងទៀត។

៨. ត្រីសម្បូរខ្លាញ់

អាស៊ីតខ្លាញ់សុខភាពល្អដែលមានផ្ទុកក្នុងត្រីសម្បូរខ្លាញ៉ដូចជាត្រីសាលម៉ុន, ត្រីធូណា និងត្រីសម្បូរខ្លាញ់ដទៃទៀតអាចបង្កើនការផលិតមេឡាតូនីន។ អាស៊ីតខ្លាញ់ទាំងនេះកាត់បន្ថយកម្រិតនៃអ័រម៉ូនស្ត្រេសក្នុងឈាម។ ជាលទ្ធផលអ្វីដែលអ្នកចង់ធ្វើក្រោយពេលទទួលទាននោះ គឺការគេង។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕