អស់បារម្ភទៀតហើយ! បំបាត់អាការៈហើមឈឺ-កជើង និងប្រអប់ជើង ជាមួយរូបមន្តធម្មជាតិទាំងនេះ

ប្រអប់ជើង ជាផ្នែកដ៏សំខាន់មួយនៃរាងកាយ។ ទោះជាយ៉ាងណា នៅពេលមានផ្ទៃពោះ ឬធាត់លើសទម្ងន់ នោះអ្នកអាចនឹងប្រឈមមុខនូវបញ្ហាហើមជើង ក៏ដូចជា-កជើងជាប្រចាំមិនខាន! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែកុំបារម្ភ បញ្ហានេះអាចដោះស្រាយបានយ៉ាងងាយ ដោយគ្រាន់តែអនុវត្តតាមរូបមន្តបែបធម្មជាតិមួយចំនួន។ ថាតើមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីវិធីងាយៗបំបាត់អាការៈហើមឈឺជើង និងកជើង ៖

១. ត្រាំទឹកអំបិល Epsom 

អំបិល Epsom អាចរកទិញបាននៅតាមផ្សារទំនើប។ អំបិលនេះមានប្រសិទ្ធិភាពខ្ពស់ក្នុងការបំបាត់អាការៈឈឺហើមជើង។ អ្វីដែលអ្នកត្រូវធ្វើ គឹគ្រាន់តែរំលាយអំបិល Epsom ចំនួន ២ ទៅ ៣ ពែងក្នុងធុងទឹក ហើយត្រាំជើងក្នុងទឹកអំបិលនេះជាការស្រេច។

២. ហាត់យូហ្កា

ការធ្វើលំហាត់ប្រាណបែបស្រាលៗដូចជា យូហ្កា អាចជួយសម្រួលដល់ចរន្តឈាមរត់ ហើយបញ្ឈប់ឈាមមិនឲ្យប្រមូលផ្ដុំនៅត្រង់ផ្នែកមួយចំនួនដូចជា ប្រអប់ជើង និងកជើង។ យូហ្កាដែលតម្រូវឲ្យលើកជើងឡើងខ្ពស់ជាងបេះដូង ក៏អាចជួយកាត់បន្ថយសម្ពាធ និងការហើម ហើយគ្មានកម្លាំងនៃប្រអប់ជើងផងដែរ។

៣. ទទួលទានថ្នាំគ្រាប់ជាតិម៉ាញ៉េស្យូម

ប្រសិនបើអ្នកកំពុងជួបប្រទះអាការៈឈឺហើមជើង និងកជើងខ្លាំងជាប្រចាំ នោះអ្នកអាចពិគ្រោះជាមួយអ្នកផ្ដល់ប្រឹក្សាផ្នែកសុខភាពថាតើអ្នកអាចទទួលទានថ្នាំគ្រាប់ជាតិម៉ាញ៉េស្យូមដើម្បីបំបាត់ការឈឺចាប់បានដែរទេ។ ជាញឹកញយ កង្វះនៃជាតិម៉ាញ៉េស្យូមក្នុងរាងកាយបណ្ដាលឲ្យមានការរលាកនៃប្រអប់ជើងបង្កការហើម និងឈឺចាប់។

៤. លើកជើង

ការលើកជើងឲ្យរាងខ្ពស់ ជាវិធីដ៏ល្អ ហើយងាយបំផុតមួយសម្រាប់ដោះស្រាយបញ្ហាឈឺហើមប្រអប់ជើង។ ព្យាយាមដាក់ជើងឲ្យខ្ពស់ឡើងនៅពេលគេង ដោយប្រើប្រាស់ខ្នើយកល់ក្រោមជើងឲ្យប្រអប់ជើងខ្ពស់ជាងបេះដូង ដើម្បីឲ្យសារធាតុរាវត្រង់កន្លែងហើមហូរចេញ និងត្រូវបានស្រូបយក ឬបញ្ចេញចោលតាមរយៈទឹកនោម។

៥. ការម៉ាស្សា

ការម៉ាស្សាទៀងទាត់ត្រង់កន្លែងហើម អាចជួយសម្រួលដល់លំហូរឈាម ហើយរារាំងការប្រមូលផ្ដុំសារធាតុរាវក្នុងប្រអប់ជើង។

៦. ទទួលទានទឹកឲ្យបានច្រើន

ទឹក ជួយកាត់បន្ថយជាតិសូដ្យូម និងកាហ្វេអ៊ីនដែលជាមូលហេតុចម្បងបង្កការរលាកផ្នែកខាងក្រោមនៃរាងកាយ។ ការទទួលទានទឹកធម្មតាឲ្យបានពី ៨ ទៅ ១០ កែវ ក្នុងមួយថ្ងៃជួយកម្ចាត់ជាតិពុលផ្សេងៗចេញពីរាងកាយ។ ដើម្បីទទួលបានប្រសិទ្ធិភាពកាន់តែប្រសើរ ចូរបន្ថែមក្រូចឆ្មារប៉ុន្មានចំនិតក្នុងទឹក ដោយក្រូចឆ្មារមានឥទ្ធិពលប្រឆាំងការរលាក។

៧. ហែលទឹក

ការហែលទឹកត្រឹម ៣០ នាទីក្នុងមួយថ្ងៃ អាចកាត់បន្ថយការហើម និងការឈឺចាប់បានគួរឲ្យកត់សម្គាល់។

៨. ជៀសវាងទទួលទានអំបិល និងកាហ្វេអ៊ីន

កាត់បន្ថយការទទួលទានអាហារ ក៏ដូចជាភេសជ្ជៈដែលមានផ្ទុកជាតិសូដ្យូម និងកាហ្វេអ៊ីន ក៏ព្រោះសារជាតិទាំងពីរនេះបង្កឲ្យមានការប្រមូលផ្ដុំសារធាតុរាវក្នុងប្រអប់ជើង៕