តើមានការឈឺក្បាលប៉ុន្មានប្រភេទដែលបង្កឡើងដោយចំនីអាហារ ។ អ្នកឯកទេសមួយចំនួននិយាយថា មានតិចតួចប៉ុណ្ណោះប្រហែលជា ៥ ទៅ២០ភាគរយទេ ។ ចំនែកអ្នកផ្សេងៗទៀតដូចជាវេជ្ជបណ្ឌិត James Breneman អតីតនាយកនៃគណៈកម្មាធិការចំនីអាហារអាឡែរហ្ស៊ី របស់ American College of Allergy និយាយថា “ខ្ញុំជឿជាក់ថា ចំនួនបីភាគបួននៃការឈឺក្បាលបែបប្រកាំងគឺមានការទាក់ទងនឹងចំនីអាហារ ។
” ដូច្នេះចំនីអាហារដែលយើងបរិភោគសព្វថ្ងៃច្រើនតែបង្កអោយមានការឈឺក្បាល ហើយអ្នកឯកទេសមួយចំនួនជឿជាក់ថា ភាគច្រើននៃការឈឺក្បាលគឺបណ្តាលមកពីអាហារយើងបរិភោគ ។ ឧទាហរណ៍ ស្ត្រីម្នាក់ បានរកឃើញមូលហេតុនៃការឈឺក្បាលបែបប្រកាំងរបស់គាត់គឺ Cinnamon (គ្រឿងទេសដាក់សំរាប់បន្ថែមរស់ជាតិនំខេគ) ។ វេជ្ជបណ្ឌិត Joel Saper សាស្ត្រាចារ្យខាងឱសថនៅឯសាកលវិទ្យាល័យ Michigan Stateនិយាយថា នៅក្នុងតារាងមូលហេតុដែលច្រើនតែធ្វើអោយឈឺក្បាលបែបប្រកាំងគឺជាទឹកដោះគោ ហើយយន្តការដែលធ្វើអោយឈឺក្បាលបែបនេះគឺមិនទាន់ដឹងនៅឡើយទេ ។ វេជ្ជបណ្ឌិត Buchholz គិតថា មូលហេតុលេខមួយដែលធ្វើអោយមនុស្សភាគច្រើនកើតមានអាការៈឈឺក្បាលដ៏មានគ្រោះថ្នាក់គឺជាតិកាហ្វេអ៊ីន ។
ការកាត់បន្ថយ ឬចៀសវាងនូវអាហារណាដែលធ្វើអោយអ្នកឈឺក្បាលប្រហែលជាអាចបញ្ឈប់នូវការឈឺក្បាលបាន ។
ខាងក្រោមនេះគឺជាអាហារដែលចាត់ទុកថាមានផលមិនល្អ ហើយបង្កអោយមានការឈឺក្បាលកើតមានឡើង ។ ការស្រាវជ្រាវភាគច្រើនត្រូវបានរកឃើញជាពិសេសលើមនុស្សដែលមានការឈឺក្បាលដោយសារសរសៃឈាម ដែលគេស្គាល់ថាប្រកាំង ប៉ុន្តែអ្នកឯកទេសផ្សេងៗទៀតនិយាយថាអាហារក៏ជាដើមហេតុធ្វើអោយកើតមាននូវការឈឺក្បាលផងដែរ ។
ស្រាក្រហម
ប្រសិនបើអ្នកគិតថាវាគឺជាដើមហេតុធ្វើអោយឈឺក្បាល ប្រហែលមែនហើយ ។ ស្រាក្រហមគឺជាភេសជ្ជៈដែលល្បីថាអាក្រក់ និងធ្វើអោយកើតមានបញ្ហាឈឺក្បាល ។ មូលហេតុប្រហាក់ប្រហែលមួយគឺថា ស្រាក្រហមសំបូរទៅដោយជាតិទំពាំងបៃជូ ដែលគេស្គាល់ថា Congeners រួមទាំង Tyramine ទៀតផង ។ អំណះអំណាងដែលថា ស្រាក្រហមអាចធ្វើអោយឈឺក្បាលបានដោយសារតែមានការសិក្សាជាច្រើនគាំទ្ររឿងនេះ ក្នុងនោះក៏មានការធ្វើតេស្តទៅលើអ្នកជំងឺឈឺក្បាលបែបប្រកាំងចំនួន ១៩នាក់ដែរ ។
អ្នកស្រាវជ្រាវម្នាក់ឈ្មោះថា Julia T. Littlewood នៅឯគ្លីនិក Princess Margaret Migraine ក្នុងមន្ទីរពេទ្យ Charing Cross នៃទីក្រុងឡុង បានធ្វើការពិសោធន៍ទៅលើស្រាក្រហមអេស្ប៉ាញមួយដប់ដែលមានចំនុះ ២២៥មីលីលីត និងស្រាបមួយប្រភេទទេដែលមានចំនុះដូចគ្នាគឺស្រាវ៉ូតកា (Vodka) ផ្សំជា មួយគ្នានឹងជាតិក្រូចឆ្មា ហើយស្រាទាំងពីរប្រភេទមានកំរិតជាតិអាលកុលស្មើគ្នា ។
រយៈពេលបីម៉ោងនៃការតាមដានដ៏ដិតដល់ឃើញថាអ្នកជំងឺឈឺក្បាលបែបប្រកាំង ៩នាក់ក្នុងចំនោម ១១នាក់ ដែលបានទទួលទានស្រាក្រហមបែរជាធ្វើអោយការប្រកាំងនោះកាន់តែខ្លាំងជាងមុន ដោយមានការឈឺខ្ទោកៗនៃក្បាលមួយចំហៀង ក្អួតចង្អោ និងចាញ់ពន្លឺ ។ ចំពោះអ្នកដែលទទួលទានស្រាវ៉ូតកាវិញមិនមានឃើញបង្ហាញពីរោគសញ្ញាអ្វីនៃការឈឺក្បាលនោះទេ ។ ទាំងនេះមិនមែនអោយតែផឹកស្រាក្រហមត្រូវតែធ្វើអោយឈឺក្បាលទាំងអស់នោះទេ ។
ចំនុចសំខាន់របស់វេជ្ជបណ្ឌិត Littlewood គឺថាស្រាក្រហមត្រូវបានចាត់ទុកថាជាអ្នកបង្កអោយមានការឈឺក្បាល ហើយភាពជាក់ស្តែងនៃការការធ្វើអោយឈឺក្បាលនេះមិនមានការទាក់ទងនឹងជាតិអាលកុលក្នុងស្រានោះទេ ប៉ុន្តែជាតិ Tyramines ទេប្រហែលជាដើមហេតុនៃរឿងនេះ ។
សូកូឡា
សូកូឡាគឺជាមូលហេតុដ៏ឃោរឃៅមួយធ្វើអោយកើតការឈឺក្បាលបែបប្រកាំង ។ ក្នុងការសង្កេតនាពេលថ្មីៗនេះទៅលើអ្នកជំងឺប្រកាំងចំនួន ៤៩០នាក់ ឃើញថា ១៩%នៃការប្រកាំងទាំងនោះកើតឡើងដោយសារការបរិភោគសូកូឡានៅក្នុងរបបអាហាររបស់ពួកគេ ហើយបន្ទាប់មកមានបន្ថែមនូវការផឹកស្រាបន្ថែមទៀត ។
ការសិក្សាមួយដែលធ្វើឡើងដោយជនជាតិអង់គ្លេសហើយបានបង្ហាញពីភាពជាក់ស្តែងពិតប្រាកដមួយលើអ្នកជំងឺប្រកាំងចំនួន ២០នាក់ ។
ការរកឃើញបានបញ្ជាក់យ៉ាងច្បាស់ថា សូកូឡាពិតជាធ្វើអោយពួកគេឈឺក្បាលមែន ។ ក្នុងពេលធ្វើតេស្ត អ្នកស្រាវជ្រាវជាច្រើនបានអោយអ្នកជំងឹចំនួន ១២នាក់បរិភោគសូកូឡាចំនួន ៤០ក្រាម ចំនែកអ្នកដែលនៅសល់អោយបរិភគសូកូឡាក្លែងក្លាយ ។ ក្រោយមកក្នុងរយៈពេល ២២ម៉ោង មានអ្នកជំងឺប្រាំនាក់ស្មើនឹង ៤០ភាគរយ ដែលបានបរិភោគសូកូឡាពិតប្រាកដកើតមានសញ្ញានៃការឈឺក្បាលបែបប្រកាំង ។ ចំពោះអ្នកជំងឺដែលបរិភោគសូកូឡាក្លែងក្លាយវិញមិនឃើញមាននរណាម្នាក់មានការឈឺក្បាលនោះទេ ។
សាច់ក្រក Hot-dog
ប្រសិនបើអ្នកងាយនឹងកើតមានការឈឺក្បាលចូរធ្វើការប្រុងប្រយ័ត្ននឹងការសាច់ក្រក Hot-dog សាច់បីជាន់ សាច់ក្រកហឹល សាច់ហេម និងសាច់ផ្សេងៗទៀតដែលមានជាតិសូដ្យូមនីត្រីត (Sodium Nitrite) ឬនីត្រាត (Nitrate) ព្រោះគេស្គាល់ថាវាគឺជាដើមហេតុធ្វើអោយឈឺក្បាល ។ អ្នកឯកទេសខាងជំងឺសរសៃប្រសាទ William R. Henderson និង Nell H.Raskin នៃសាកលវិទ្យាល័យ California នៃទីក្រុង San Francisco បានគាំទ្រថា សាច់ក្រក Hot-dog គឺជាភ្នាក់ងារធ្វើអោយឈឺក្បាលមែន ។ គាត់មានអាយុ ៥៨ឆ្នាំ ហើយមានការឈឺចាប់ដោយសារការឈឺក្បាល និងពេលខ្លះឃើញមានឡើងក្រហមពេញមុខប្រហែលជា ៣០នាទីក្រោយពីទទួលទានសាច់ក្រក Hot-dog សាច់បីជាន់ ឬសាច់ផ្សេងៗទៀតដែលធ្វើអំពីជាតិ Nitrite ។ ការឈឺក្បាលនៅបន្តរហូតដល់ច្រើនម៉ោង ។
ក្នុងការធ្វើតេស្ត គាត់បានយល់ព្រមទទួលទានភេសជ្ជៈដែលគ្មានពណ៌ គ្មានរស់ជាតិ ហើយក្នុងនោះមានការដាក់បញ្ចូលនូវជាតិ Sodium Nitrite ចំនួន ១០មីលីក្រាម ឬតិចជាងនេះ ។ គាត់មិនបានដឹងថាខ្លួនឯងបានផឹងអ្វីចូលនោះទេ ។ បន្ទាប់មកក្រោយពីគាត់ផឹកបាន ៨ដង គាត់បែរជាចាប់ផ្តើមចេញសញ្ញានៃការឈឺក្បាលកើតមានឡើង ។ ក្រោយមក បុរសម្នាក់នេះក៏បានលះបង់នូវការបរិភោគសាច់ដែលធ្វើអំពី Nitrite ចោលទើបធ្វើអោយការឈឺក្បាលរបស់គាត់មិនកើតមានទៀត ។
