មានអាហារច្រើនណាស់ ដែលអ្នកគួរតែបញ្ចូលក្នុងរបបអាហារ បើសិនជាសន្លាក់អ្នកងាយនឹងឈឺច្រើន ។ ប៉ុន្តែក៏មានអាហារជាច្រើនដែលគួរតែចៀសវាងដែរ បើសិនជាអ្នកចង់បំបាត់ការឈឺចាប់ក្នុងសន្លាក់នោះ ។ ដូច្នេះតើអាហារអ្វីដែលអ្នកគួរតែចៀសវាងទៅបើសិនជាមិនចង់ឈឺសន្លាក់បន្ថែមទៀត?
ទឹកដោះគោ និងផលិតផលធ្វើពីទឹកដោះគោ
ទឹកដោះគោ និងផលិតផលធ្វើពីទឹកដោះគោគឺជាប្រភពដ៏អស្ចារ្យនៃជាតិកាលស្យូម ដែលរាងកាយត្រូវការដើម្បីជួយឲ្យឆ្អឹងរឹងមាំ និងបន្ថយការកើតជំងឺពុកឆ្អឹង។ ប៉ុន្តែផលិតផលទាំងនេះក៏អាចធ្វើឲ្យមានការរលាកដល់ជាលិកាទន់ៗរបស់សន្លាក់ដែរ។ ដូច្នេះបើសិនជាអ្នកចេះតែយល់ថាឈឺ ឬគាំងក្នុងសន្លាក់ជាប់ យកល្អគួរតែតមអាហារនេះសិន។
ញ៉ាំប្រៃ
មនុស្សគ្រប់គ្នាដឹងហើយថា អាហារប្រៃមិនល្អចំពោះសុខភាពទេ ជាពិសេសបេះដូងតែម្តង ដោយសារតែវាធ្វើឲ្យលើសសម្ពាធឈាមបាន។ តែការញ៉ាំប្រៃច្រើនក៏អាចនាំឲ្យខូចសន្លាក់បានដែរ ដោយសារតែជាតិសូដ្យូមនឹងទៅកកកុញក្នុងសន្លាក់ ដែលជាហេតុនាំឲ្យសន្លាក់ងាយនឹងឈឺ ឬហើម ជាមួយនឹងការលើសសម្ពាធឈាមទៀត។
ញ៉ាំផ្អែមពេក
តាមពិតទៅមិនសូវមាននរណាដឹងច្រើនអំពីការពិតរបស់ជាតិផ្អែមឡើយ ជាពិសេសវាធ្វើឲ្យមានការរលាក និងអាចបង្កជាការឈឺចាប់ដល់សន្លាក់ថែមទៀតផង។ ក្រៅពីនេះ របបអាហារដែលមានជាតិផ្អែមខ្ពស់ គឺងាយនឹងឡើងទម្ងន់ រហូតដល់ដាក់សម្ពាធដល់សន្លាក់ កែងជើង ជង្គង់ និងត្រគាក ដែលធ្វើឲ្យវាងាយនឹងរងការឈឺចាប់ណាស់។
អាហារចៀន ឬឆា
យកល្អអ្នកគួរតែចៀសឲ្យឆ្ងាយពីអាហារមានជាតិខ្លាញ់ច្រើនៗផង ព្រោះវាមិនស័ក្តិសមសម្រាប់អ្នកដែលកំពុងតែមានបញ្ហាសន្លាក់ទេ។ អាហារមានជាតិខ្លាញ់បែបនេះអាចធ្វើឲ្យមានការរលាកច្រើន ដោយមិនរើសមុខថាចំពោះតែសន្លាក់មួយមុខឡើយ។ យ៉ាងណាមិញ ការញ៉ាំអាហារខ្លាញ់ច្រើនក៏ងាយនឹងធ្វើឲ្យធាត់លើសទម្ងន់ដែរ។
ផលិតផលកៃឆ្នៃ
យោងទៅតាមអជ្ញាធរសុខាភិបាល អ្វីៗទាំងអស់ដែលកៃឆ្នៃអាចធ្វើឲ្យសន្លាក់រងការឈឺចាប់បានទាំងអស់។ ដោយសារតែអាហារទាំងនេះផ្ទុកទោដោយសារធាតុគីមីច្រើន ដែលធ្វើឲ្យកើតជាការរលាកតែម្តង។ ក្រៅពីនេះអាហារកៃឆ្នៃសម្បូរជាតិផ្អែម និងប្រៃណាស់។
គ្រឿងស្រវឹង
អ្នកជំនាញនិយាយថា ការញ៉ាំគ្រឿងស្រវឹងក្នុងកម្រិតមធ្យមអាចផ្តល់ផលល្អចំពោះសុខភាព តែបើញ៉ាំច្រើនវិញ នឹងបង្កជាបញ្ហាដល់សុខភាពវិញ ហើយក្នុងនោះក៏មានការឈឺសន្លាក់ផងដែរ៕