តើអ្នកឧស្សាហ៍ហើមពោះមែនទេ? អ្នកប្រហែលជាឆ្ងល់ហើយថា វាមកពីហេតុអ្វី។ តាមការពិតទៅ វាគឺកើតឡើងដោយសារតែយើងមានបញ្ហាពិបាករំលាយអាហារ។ នេះគឺមកពីជាតិខ្យល់ផ្តុំគ្នានៅក្នុងពោះវៀន ដែលធ្វើឱ្យយើងគោះទៅដូចស្គរ។ ថ្ងៃនេះ អ្នកនឹងបានស្គាល់ពីទម្លាប់៣យ៉ាង ដែលធ្វើឱ្យអ្នកមានបញ្ហានេះ។
១. ទំពារអាហារលឿនពេក
មានមូលហេតុពីរដែលបញ្ជាក់ថា ការទទួលទានអាហារលឿនៗ គឺមិនល្អសោះឡើយ។ ការបរិភោគលឿន ធ្វើឱ្យអ្នកទំពារអាហារមិនបានល្អ ដែលបង្កបញ្ហាដល់ប្រព័ន្ធរំលាយអាហារ ជាពិសេសគឺក្រពះរបស់អ្នក។ ម្យ៉ាងវិញទៀត វាធ្វើឱ្យអ្នកលេបខ្យល់ចូលពោះដោយចៃដន្យច្រើនជាងធម្មតា ជាហេតុបណ្ដាលឱ្យងាយនឹងហើមពោះ។
២. ទទួលទានជាតិសសៃច្រើនពេក
ពិតណាស់របបអាហារមានជាតិសសៃខ្ពស់ គឺល្អសម្រាប់ទប់ស្កាត់បញ្ហាទល់លាមកនិងជួយឱ្យស្រកទម្ងន់ដែលលើស ក៏ដូចជាកាត់បន្ថយហានិភ័យនៃជំងឺមហារីកពោះវៀនធំផងដែរ។ ទោះជាយ៉ាងណា មនុស្សចំនួនបែរជាជួបប្រទះអាការៈហើមពោះទៅវិញក្រោយទទួលទានអាហារសម្បូរជាតិសសៃច្រើន។ ប្រសិនបើអ្នកជាម្នាក់ក្នុងចំណោមនោះ ចូរព្យាយាមបន្ថយការទទួលទានជាតិសសៃដើម្បីចៀសផុតបញ្ហា។
៣. ទទួលទានអាហារកញ្ចប់ច្រើនពេក
អាហារកញ្ចប់ ឬអាហារកែច្នៃ ដូចជាមីស្រុះ មានផ្ទុកជាតិសូដ្យូមខ្ពស់ ដែលអាចនាំឱ្យហើមពោះ។ ដូច្នេះដើម្បីជាការប្រសើរ ចូរព្យាយាមទទួលទានអាហារស្រស់ៗជំនួសវិញ ឬកម្រិតការទទួលទានអាហារកញ្ចប់ និងជ្រើសរើសប្រភេទដែលមានផ្ទុកជាតិសូដ្យូមត្រឹម ៥០០មីលីក្រាម ឬ ក្រោមនេះ៕