កត្តាហានិភ័យនៃជំងឺមហារីក រួមមានការប៉ះពាល់នឹងសារធាតុគីមី ឬសារធាតុគ្រោះថ្នាក់ផ្សេងទៀត ក៏ដូចជាទម្លាប់មួយចំនួន។ ខណៈពេលដែលកត្តាហានិភ័យមួយចំនួនមិនអាចជៀសវាងបាន ទម្លាប់មួយចំនួនដែលបង្កើនភាពងាយនឹងកើតជំងឺមហារីក គឺជារឿងដែលស្ថិតក្នុងការគ្រប់គ្រងរបស់អ្នក ហើយនៅពេលដែលទម្លាប់ទាំងនេះត្រូវបានត្រួតពិនិត្យ អ្នកអាចជៀសបានពីការកើតមហារីកមួយភាគធំ។
១. ការប្រើប្រាស់គ្រឿងស្រវឹងច្រើនពេក
សុរាគឺជាសារធាតុបង្កមហារីករបស់មនុស្ស។ នៅពេលដែលជាតិអាល់កុលចូលក្នុងរាងកាយ វាត្រូវបានបំបែកទៅជាសារធាតុអាសេតាល់ដេអ៊ីត (acetaldehyde) ដែលជាសារធាតុគីមីដែលបំផ្លាញ DNA។ ការខូចខាតនេះអាចនាំទៅដល់ការរីកធំធាត់នៃកោសិកា បង្កើតជាដុំសាច់មហារីក។ ការកាត់ផ្តាច់ជាតិអាល់កុលទាំងស្រុង គឺត្រូវបានណែនាំយ៉ាងខ្លាំង ប៉ុន្តែសម្រាប់អ្នកដែលយល់ថាវាមិនអាចទៅរួចទេក្នុងការធ្វើបែបនេះ ការប្រើប្រាស់គ្រឿងស្រវឹងគួរតែត្រូវបានកាត់បន្ថយដល់កម្រិតអប្បបរមាបំផុត។ ការផឹកស្រាអាចបង្កើនហានិភ័យនៃការវិវត្តទៅជាជំងឺមហារីកមាត់ បំពង់ក បំពង់អាហារ ថ្លើម និងសុដន់។
២. ការជក់បារី
ការជក់បារីនៅតែជាមូលហេតុចម្បងមួយនៃជំងឺមហារីក។ ការជក់បារីធ្វើឱ្យខូចសុខភាពជាទូទៅ និងបង្កើនហានិភ័យនៃជំងឺមហារីកនៅក្នុងផ្នែកជាច្រើននៃរាងកាយ រួមទាំងខួរឆ្អឹង សួត តម្រងនោម មាត់ស្បូន លំពែង បំពង់ក បំពង់អាហារ ប្លោកនោម និងជាច្រើនទៀត។
៣. កង្វះលំហាត់ប្រាណ
ការធ្វើលំហាត់ប្រាណជាទៀងទាត់មានអត្ថប្រយោជន៍ជាច្រើនចំពោះសុខភាពទូទៅរបស់មនុស្សម្នាក់ៗ រួមទាំងកាត់បន្ថយឱកាសនៃការវិវត្តទៅជាជំងឺមហារីកផងដែរ។ អ្នកដែលធ្វើសកម្មភាពរាងកាយទៀងទាត់ មានហានិភ័យកើតជំងឺមហារីកទាបជាងអ្នកដែលរស់នៅបែបខ្ជិលច្រអុស។ ការធ្វើលំហាត់ប្រាណជាទៀងទាត់មានឥទ្ធិពលវិជ្ជមានទៅលើការទប់ស្កាត់ជំងឺមហារីកសុដន់ និងស្បូន៕
