ការផាត់មុខ ឬ Makeup គឺជាទម្លាប់មួយរបស់មិត្តនារី នៅពេលដែលគាត់ចេញទៅណាមកណា។ នេះគឺជាការលើកសម្រស់មួយ ដែលគេទទួលស្គាល់ថាជារឿងធម្មតាទៅហើយ។ អ្នកអាច Makeup ពេលណា ឬ នៅឯណា តាមការចង់របស់អ្នក។ តែមានពេលខ្លះ អ្នកមិនត្រូវ Makeup ទេ ព្រោះថា វាអាចផ្តល់ផលអាក្រក់មកស្បែកមុខរបស់អ្នក។ តើពេលទាំងនោះមានអ្វីខ្លះ?
១. ពេលទៅអាងហែលទឹក
ហាមប្រើគ្រឿងសម្អាង ពេលទៅអាងហែលទឹក ព្រោះសារធាតុក្លរីន និងសារធាតុសម្លាប់មេរោគនៅក្នុងទឹកលាយឡំ ជាមួយគ្រឿងសម្អាង ដែលបណ្តាលឱ្យមានការឡើងមុន ក៏ដូចជារលាកស្បែក។
២. ពេលទៅកន្លែងហាត់ប្រាណ
វាមិនចម្លែកទេ ដែលអ្នកចង់មើលទៅស្អាតនៅពេលទៅកន្លែងហាត់ប្រាណ ប៉ុន្តែនៅពេលអ្នកលាបម្សៅទ្រនាប់ វាលាយជាមួយនឹងញើសរបស់អ្នក និងស្ទះរន្ធញើសលើស្បែក ដែលជាហេតុនាំឱ្យកើតមុន។
៣. នៅពេលដែលអ្នកកំពុងឡើងមុន
នៅពេលដែលអ្នកមានបញ្ហាឡើងមុន អ្នកប្រហែលជាគិតថាការ Makeup ជួយបិទបាំងស្នាមទាំងនោះ តែតាមការពិតវាអាចត្រឹមតែដោះទាល់មួយពេលប៉ុណ្ណោះ។ ពេលដែលម្សៅនោះស្ទះរន្ធញើសរបស់អ្នក ការឡើងមុននឹងកាន់តែអាក្រក់ជាងមុនទៅទៀត។
៤. ពេលសម្អាតផ្ទះ
ជៀសវាងការប្រើប្រាស់គ្រឿងសម្អាង នៅពេលអ្នកកំពុងធ្វើការសម្អាត នេះដោយសារតែភាពកខ្វក់ និងមេរោគនៅក្នុងបរិយាកាសនឹងលាយឡំ និងធ្លាក់លើមុខរបស់អ្នក ច្របល់គ្នានឹងម្សៅដែលអ្នកកំពុងប្រើនៅលើមុខ។
៥. បន្ទាប់ពីធ្វើ PRP ចាក់ម្ជុលលើមុខ
Microneedling ឬ PRP ឬ ការចាក់ម្ជុលតូចៗលើមុខ គឺជានីតិវិធីកែសម្ផស្សធ្វើឱ្យស្អាតសម្រាប់អ្នកដែលខ្លាចភាពចាស់។ គេប្រើដើម្បីជម្រុញការបង្កើតប្រូតេអ៊ីន ក្នុងគោលបំណងកាត់បន្ថយស្នាមជ្រួញ។ អ្នកគួរចៀសវាងការតុបតែងមុខបន្ទាប់ពីធ្វើបែបនេះ ទើបស្បែកអាចជាសះស្បើយ ៕
