ស្បែករលោង និងភ្លឺថ្លា តែងតែជាអ្វីដែលគ្រប់គ្នាប្រាថ្នាចង់បាន។ ប៉ុន្តែពេលខ្លះ យើងប្រហែលជាកំពុងតែរារាំងខ្លួនឯងមិនឱ្យសម្រេចក្តីប្រាថ្នានេះដោយមិនដឹងខ្លួន ដោយសារតែសកម្មភាពរបស់យើងផ្ទាល់តែម្តង។ ថ្ងៃនេះ អ្នកនឹងបានស្គាល់ពីកំហុសថែរក្សាស្បែកមុខ៥យ៉ាង ដែលធ្វើឱ្យអ្នកមិនអាចមានស្បែកគួរជាទីគាប់ចិត្ត។
១. លាងមុខជាមួយសាប៊ូដុំ
សាប៊ូដុំមិនល្អសម្រាប់មុខរបស់អ្នកទេ។ វាធ្វើឱ្យមុខរបស់អ្នកខ្សោះជាតិទឹក ហើយទុកឱ្យវាមានអារម្មណ៍តឹង និងស្ងួត។ វាជាការប្រសើរក្នុងការប្រើក្រែមលាងសម្អាតមុខ ដែលផ្តល់សំណើមដល់ផ្ទៃមុខ និងស្តារកម្រិត pH ឡើងវិញ។
២. ខាត់ស្បែកច្រើនពេក
ការខាត់ស្បែកជម្រុះកោសិកាចាស់ៗ ពីរទៅបីដងក្នុងមួយសប្តាហ៍គឺមិនមានបញ្ហាអ្វីទេ។ វាជួយកម្ចាត់កោសិកាស្បែក ដែលងាប់នៅលើមុខរបស់អ្នក។ អ្នកត្រូវការកោសិកាស្បែកថ្មីដើម្បីបង្កើតជាស្រទាប់ស្បែកថ្មី មុនពេលអ្នកខាត់ជម្រុះម្តងទៀត។
៣. កង្វះជាតិសំណើម
ការផ្តល់ជាតិសំណើមដល់ស្បែករបស់អ្នក គឺជារឿងសំខាន់។ មានការយល់ច្រលំថា សម្រាប់អ្នកស្បែកមុខខ្លាញ់មិនត្រូវការសំណើមទេ។ តែវាខុសហើយ។ នៅពេលដែលយើងផ្តល់សំណើមដល់ស្បែក ស្បែករបស់យើងនឹងមិនបញ្ចេញខ្លាញ់ច្រើនដូចពេលដែលស្បែកស្ងួតនោះទេ។ ដូចនេះ បើទោះបីជាអ្នកឡើងមុនដោយសារស្បែកមុខខ្លាញ់ក៏ដោយ ក៏អ្នកមិនត្រូវភ្លេចផ្តល់សំណើមឱ្យវាដែរ។
៤. មិនប្រើឡេការពារកម្តៅថ្ងៃ
ឡេការពារកម្តៅថ្ងៃ គួរតែជាផ្នែកមួយដ៏សំខាន់នៃទម្លាប់ថែរក្សាស្បែករបស់អ្នក ឬ ជាធាតុផ្សំដ៏សំខាន់នៅក្នុងក្រែមផ្តល់សំណើមរបស់អ្នក នេះដោយសារតែកាំរស្មីនៃព្រះអាទិត្យអាចប៉ះពាល់ដល់ស្បែករបស់អ្នក និង បណ្តាលឱ្យមានស្នាមជ្រួញ។
៥. មិនលាងសម្អាតមុខ
អ្នកគួរតែលាងសម្អាតមុខពីរដងក្នុងមួយថ្ងៃ និងនៅពេលណាដែលអ្នកហាត់ប្រាណ ឬញើសខ្លាំង។ ការមិនបានលាងសម្អាតមុខជាប្រចាំនឹងបង្កឱ្យមានភាពកខ្វក់ និងបាក់តេរី។ ជាលទ្ធផល មុខរបស់អ្នកនឹងឡើងមុន ហើយមានស្នាម ដែលមិនស្អាត៕
