ការឈឺសុដន់មិនមែនសុទ្ធតែមកពីជំងឺមហារីកនោះទេ។ វាអាចមកពីមូលហេតុផ្សេងៗទៀត ដែលមូលហេតុខ្លះមិនធ្ងន់ធ្ងរឡើយ។ ថ្ងៃនេះ អ្នកនឹងស្គាល់ពីមូលហេតុ៣យ៉ាងសំខាន់ៗ ហើយមិនធ្ងន់ធ្ងរ តែអាចឱ្យអ្នកគិតថា ធ្ងន់ធ្ងរបាន។
១. មិនមានការទ្រទ្រង់គ្រប់គ្រាន់
បើសិនជាអ្នកមានសុដន់ដែលធំ ដូច្នេះអាវទ្រនាប់ប្រហែលជាមិនអាចផ្តល់ការទ្រទ្រង់គ្រប់គ្រាន់ឡើយ។ រឿងនេះភាគច្រើនបណ្តាលមកពីទម្ងន់របស់សុដន់ធ្វើឲ្យយារដល់សារសសៃចង និងជាលិកាក្នុងសុដន់ និងធ្វើឲ្យមានការឈឺចាប់។ ការឈឺចាប់នេះមិនត្រឹមតែកើតឡើងលើសុដន់ទេ វាក៏អាចធ្វើឲ្យឈឺដល់ក និងខ្នងទៀតផង។ យកល្អគួរតែស្វែងរកអាវទ្រនាប់ណាដែលមានទំហំត្រូវនឹងប្រភេទសុដន់របស់អ្នកផង។
២. ស្ថិតក្នុងស្ថានភាពត្រៀមមករដូវ
ការត្រៀមមករដូវនឹងធ្វើឲ្យស្ត្រីមានអារម្មណ៍មិនល្អ ឈឺចាប់បែបរមួលៗក្នុងពោះ និងឈឺសុដន់។ ការឈឺចាប់ជាប់ទាក់ទងនឹងភាពតឹងៗក្នុងសុដន់ ហើយក៏ច្រើនតែកើតឡើងនៅពាក់កណ្តាលចុងក្រោយនៃវដ្តរដូវដែរ។ ការឈឺចាប់នេះច្រើនតែឈឺបែបងំ និងអាចមានបាត់ៗ។ នៅពេលនេះ អ្នកអាចមានអារម្មណ៍ថា សុដន់គឺរឹងខ្លាំង។ រឿងនេះកើតឡើងដោយសារតែបម្រែបម្រួលអ័រម៉ូនដែលធ្វើឲ្យសុដន់ស្ត្រីហើមតឹងបែបនេះ។
៣. ហាត់ប្រាណខ្លាំងក្លាពេក
បើសិនជាអ្នកចូលចិត្តហាត់ប្រាណ មានន័យថាអ្នកកំពុងតែធ្វើឲ្យខ្លួនឯងមានការលំបាកបន្តិចហើយ។ ការលើកទម្ងន់នឹងធ្វើឲ្យគ្រិចដល់សាច់ដុំនៅទ្រូង ដែលស្ថិតនៅជិតនឹងសុដន់។ រាល់ការឈឺចាប់នៅសាច់ដុំមួយនេះអាចធ្វើឲ្យអ្នកមានអារម្មណ៍ថា ជាការឈឺនៅសុដន់ហើយ។ ការសិក្សាបានបង្ហាញថា ការដែលហាត់ប្រាណច្រើនពេក និងរត់កីឡាក៏អាចធ្វើឲ្យឈឺចាប់នៅសុដន់បានដែរ៕
