តើអ្នកធ្លាប់លឺចាស់ៗថា «ចង្កេះអង្រ្កង» ឬអត់ ? ប្រសិនបើអ្នកមិនស្គាល់ទេ អ្នកអាចមើលរាងគ្រូបង្ហាត់ហាត់ប្រាណនារីៗទៅដឹងហើយ។ ការមានចង្កេះបែបនេះ ត្រូវបានគេទទួលស្គាល់ថា ជារាងស្អាតគួរជាទីទាក់ទាញរបស់នារីៗ។ ថ្ងៃនេះអ្នកនឹងបានស្គាល់ពីវិធីងាយៗ ក្នុងការសម្រេចបានចង្កេះបែបនោះ។
១. ផ្លាស់ប្តូររបបអាហាររបស់អ្នក
ការសិក្សាផ្នែកអាហារូបត្ថម្ភបានបង្ហាញថា ការញ៉ាំគ្រាប់ធញ្ញជាតិ ផ្លែឈើ និងបន្លែ ជួយអ្នកកាត់បន្ថយបរិមាណជាតិខ្លាញ់ដែលអ្នកដាក់ចូលទៅក្នុងខ្លួនរបស់អ្នក ព្រោះវាជួយឱ្យអ្នកមានអារម្មណ៍ឆ្អែតបានយូរ។ នេះជាវិធីដ៏ល្អបំផុតដែលត្រូវបានគេជឿជាក់ថា អាចសម្រកទម្ងន់បានលឿន និងស្រកខ្លាញ់ក្បាលពោះ។ សូមចងចាំថាផ្លែឈើមួយចំនួនមានជាតិស្ករខ្ពស់ ហើយការទទួលទានវាច្រើនពេក អាចមានឥទ្ធិពលផ្ទុយ។ ចូរពិនិត្យមើលឱ្យបានច្បាស់មុនពេលទទួលទាន។
២. ផឹកទឹកឱ្យបានច្រើន
រឿងសំខាន់ដែលត្រូវចងចាំនៅពេលគិតអំពីការសម្រកទម្ងន់ គឺត្រូវប្រាកដថាអ្នកផឹកទឹកឱ្យបានច្រើន។ ទឹករារាំងរាងកាយរបស់អ្នកពីការឃ្លានអាហារផ្តេសផ្តាស ព្រោះពេលខ្លះអ្នកគ្រាន់តែធុញទ្រាន់ប៉ុណ្ណោះ តែអ្នកបែរជាគិតថាអ្នកចង់ញ៉ាំអាហារទៅវិញ។ ជាមួយគ្នានេះដែរ ទឹកក៏ជួយដល់សុខភាពស្បែកនិងសក់ទៀតផង។
៣. លំហាត់ប្រាណ
លំហាត់ប្រាណគឺជាដំណោះស្រាយដ៏ល្អឥតខ្ចោះដើម្បីធ្វើឱ្យចង្កេះរបស់អ្នកតូចជាងមុន ក្នុងរយៈពេលតែប៉ុន្មានសប្តាហ៍ប៉ុណ្ណោះ។ វាក៏អាស្រ័យលើថា តើអ្នកមានឆន្ទៈក្នុងការធ្វើការប៉ុណ្ណា។ លទ្ធផលនឹងកើតឡើង លុះត្រាតែអ្នកខិតខំប្រឹងប្រែងគ្រប់គ្រាន់ ហើយមិនមែនធ្វើវាលេងៗ។ ជាដំបូង អ្នកត្រូវបង្កើតផែនការលំហាត់ប្រាណ ដែលចាប់ផ្តើមពីកម្រិតស្រួលៗ មកកាន់តែពិបាកទៅៗ។ ដើម្បីទទួលបានលទ្ធផលកាន់តែប្រសើរ អ្នកក៏អាចធ្វើលំហាត់ប្រាណតាមគោលដៅ ជាពិសេសលំហាត់ប្រាណណាដែលជួយឱ្យរាងចង្កេះ៕
