តើអ្នកឧស្សាហ៍ទល់លាមកដែរឬទេ? ពេលណាទៅទើបគេហៅថាជាបញ្ហាទល់លាមក? គេចាត់ទុកថាអ្នកមានបញ្ហាទល់លាមក នៅពេលដែលអ្នកបត់ជើងធំមិនចេញ៣ថ្ងៃ ក្នុងមួយសប្តាហ៍ ឬ មិនញឹកដូចពេលធម្មតាដែលអ្នកធ្លាប់បន្ទោរបង់ ឬ មានបញ្ហាឈឺពោះនៅពេលអ្នកប្រឹងតែមិនចេញ ឬ លាមករបស់អ្នករឹងដូចថ្ម។ ថ្ងៃនេះ អ្នកនឹងបានស្គាល់ពីទម្លាប់៥យ៉ាង ដើម្បីដោះស្រាយបញ្ហានេះ។
១. ផឹកទឹក
នៅពេលដែលស្ថិតក្នុងស្ថានភាពលំបាកនៃការបន្ទោរបង់ ការផឹកទឹកគឺជាមធ្យោបាយដោះស្រាយដ៏ល្អឥតខ្ចោះសម្រាប់ភាពតឹងតែងនៃការទល់លាមក។ ការផឹកទឹកគឺជាការប្រសើរសម្រាប់បញ្ហាទល់លាមក តែនេះមិនមែនមានន័យថា អ្នកអាចផឹកទឹកក្រូចសូដាជំនួសនោះទេ ព្រោះថាវានឹងធ្វើឱ្យរោគសញ្ញាទល់លាមករបស់អ្នកកាន់តែអាក្រក់ទៅៗ។ ការផឹកទឹកជាប្រចាំក្នុងកម្រិតគ្រប់គ្រាន់ នឹងធ្វើឱ្យអ្នកមិនសូវប្រឈមនឹងបញ្ហាទល់លាមក។
២. ញ៉ាំជាតិសរសៃ និងបន្លែ
ជាតិសរសៃ និងបន្លែ ជួយបង្កើនចលនាពោះវៀន និងធ្វើឱ្យលាមកចេញមកកាន់តែងាយស្រួល។ ជាតិសរសៃមានពីរប្រភេទ រួមមាន រលាយនិងមិនរលាយ។ ជាតិសរសៃរលាយដូចជាគ្រាប់ធញ្ញជាតិដូចជាស្រូវសាលី និងបន្លែ បង្កើតជាកាកសំណល់យ៉ាងងាយស្រួល ខណៈដែលជាតិសរសៃមិនរលាយ ដូចជាផ្លែឈើជាដើម ធ្វើឱ្យលាមកទន់។
៣.ធ្វើចលនាឱ្យបានគ្រប់គ្រាន់
ការនៅមួយកន្លែង អាចបណ្តាលឱ្យទល់លាមក។ ការងារស្រាវជ្រាវមួយចំនួនបានភ្ជាប់លំហាត់ប្រាណទៅនឹងការបន្ថយការទល់លាមក ព្រោះវាជួយដល់ចលនាពោះវៀន។ ដូចនេះ ចូរធ្វើលំហាត់ប្រាណឱ្យបានគ្រប់គ្រាន់ ដើម្បីឱ្យពោះវៀនអ្នកដើរបានល្អ។
៤. ផឹកទឹកដោះគោតិច
ប្រសិនបើអ្នកមានបញ្ហាចាញ់ទឹកដោះគោ ឬ Lactose Intolerance ការទទួលទានទឹកដោះគោនឹងធ្វើឱ្យអ្នកមានបញ្ហាទល់លាមក ក្រោយពីរាគអស់មួយរយៈមក។ ចូរកំណត់កម្រិតទឹកដោះគោដែលអ្នកទទួលទាន។
៥. ផឹកកាហ្វេ
អ្នកវិទ្យាសាស្ត្របានរកឃើញថា កាហ្វេជួយជំរុញប្រព័ន្ធរំលាយអាហារ និងជួយអ្នកបញ្ចេញលាមកស្រួល។ នេះដោយសារតែកាហ្វេមានជាតិសរសៃរលាយ ដែលធ្វើឱ្យមានតុល្យភាពបាក់តេរីក្នុងពោះវៀន៕
